Ўзбекистоннинг реал ялпи ички маҳсулоти ўсиши 2017–2018 йилларда йилига 6–7 фоиз бўлиши кутилмоқда. Бу ҳақда S&P Global Ratings’нинг «Банк секторининг тармоқ ва мамлакатлар бўйича таҳдидларини баҳолаш: Ўзбекистон Республикаси» номли ҳисоботида маълум қилинди, деб хабар беради UzDaily.
«‘Иқтисодий дисбаланслар’ компоненти бўйича баҳомизни қайта кўриб чиққандан сўнг биз Ўзбекистондаги иқтисодий таҳдидга нисбатан тенденцияни ‘барқарор’ деб баҳолаймиз. Жорий операциялар ҳисоби профицитининг 0 фоиздан бироз юқори даражагача қисқаришига қарамай, бизнинг асосий сценарийда кўрсаткичнинг шу даражада барқарорлашувини прогноз қиламиз», — дейилади агентликнинг ҳисоботида.
«ЯИМ ўсиш суръатларининг тушиши, афтидан, тўхтайди, реал ЯИМ ўсиши эса, кутилишича, 2017–2018 йилларда йилига 6–7 фоизни ташкил қилади. Фикримизча, номинал бирликда кредитлаш ўсишининг юқори суръатлари маълум қийинчиликларни келтириб чиқаради, аммо биз ўйлаймизки, улар умуман олганда номинал бирликда иқтисодий ўсиш суръатларига мувофиқ келади ва иқтисодиётда ‘нарх кўпиклари’нинг ҳосил бўлишига олиб келмайди», — сўзида давом этади агентлик мутахассислари.
«Ўзбекистон банк тизимида тармоқ таҳдидларига нисбатан тенденцияни ‘барқарор’ сифатида баҳолаймиз. Бизнинг фикримизча, регулятив талабларнинг такомиллашуви, Ўзбекистон Марказий банкининг бошқарув сифатини яхшилаш бўйича чоралари ҳамда капитал етарлилигига талабларнинг қаттиққўллаштирилиши мамлакат банк тизимига давлат аралашуви даражасининг ошиши билан йўққа чиқарилади».
«Ўйлашимизча, банк секторида давлат иштирокидаги банкларнинг устунлик қилиши рақобатнинг ривожланишига тўсқинлик қилмоқда. Ўзбекистон банкларининг фондлаштирилиши давлат молиялаштирилиши ҳамда корпоратив депозитлар ҳажмининг ошиши муносабати билан барқарор сифатида баҳоланади. Шу билан бирга, биз чакана депозитлар ўсиш суръатларининг тушиши ҳамда активларнинг тез ўсиши туфайли банклар капитализацияси кўрсаткичларининг ёмонлашувини қайд қиламиз», — таъкидлайди S&P Global Ratingы.
Изоҳ (0)