Самарқандда қурилаётган тўртта трамвай тармоғининг узунлиги 34,8 километрни ташкил этади. Бу ҳақда, «Ўзбекистон темир йўллари»га асосланиб, «Газета.uz» хабар бермоқда.
Қурилиш ишлари икки босқичда олиб борилмоқда. Ноябрь ойида бошланган биринчи босқичда шаҳар темирйўл вокзалидан Сартепа мавзесигача 6,4 километрлик бўлак қурилади. Бу йўлда иккита айланма йўл, электр токини мослаб берувчи тўртта подстанция ва битта депо бўлиши кўзда тутилган.
Кейинчалик қурилиш ишлари темирйўл вокзалидан Сиёб бозорига қадар давом эттирилади. Мазкур йўналиш узунлиги 5 километрни ташкил этади.
Иккинчи босқичда вокзалдан Спитамен кўчаси бўйлаб Суперфосфат заводига қадар давом этадиган 12,4 километрлик трамвай йўли қурилади. Вокзал ва заводни яна бир — Нарпай кўчасидан ўтадиган 11 километр йўл орқали ҳам боғлаш режалаштирилган.
Самарқанддаги трамвай йўли март ойида ишга туширилиши айтилмоқда. Самарқандга трамвайни қайтариш ташаббуси 2016 йилнинг октябрь ойида Шавкат Мирзиёев томонидан, у ҳали Ўзбекистон Президенти вазифасини бажарувчи сифатида фаолият олиб бораётган вақтда берилган эди.
Кейинроқ Самарқандга 2011—2012 йилларда Тошкент учун Чехиядан сотиб олинган олтита Vario LF трамвайлари олиб келинди. Тошкент трамвайи 2016 йилнинг баҳорида ўз фаолиятини тугатган.Мавзуга доир: Тошкент трамвайининг 115 йиллик тарихига нуқта қўйилди
Изоҳ (0)