Samarqandda qurilayotgan to‘rtta tramvay tarmog‘ining uzunligi 34,8 kilometrni tashkil etadi. Bu haqda, “O‘zbekiston temir yo‘llari”ga asoslanib, “Gazeta.uz” xabar bermoqda.
Qurilish ishlari ikki bosqichda olib borilmoqda. Noyabr oyida boshlangan birinchi bosqichda shahar temiryo‘l vokzalidan Sartepa mavzesigacha 6,4 kilometrlik bo‘lak quriladi. Bu yo‘lda ikkita aylanma yo‘l, elektr tokini moslab beruvchi to‘rtta podstansiya va bitta depo bo‘lishi ko‘zda tutilgan.
Keyinchalik qurilish ishlari temiryo‘l vokzalidan Siyob bozoriga qadar davom ettiriladi. Mazkur yo‘nalish uzunligi 5 kilometrni tashkil etadi.
Ikkinchi bosqichda vokzaldan Spitamen ko‘chasi bo‘ylab Superfosfat zavodiga qadar davom etadigan 12,4 kilometrlik tramvay yo‘li quriladi. Vokzal va zavodni yana bir — Narpay ko‘chasidan o‘tadigan 11 kilometr yo‘l orqali ham bog‘lash rejalashtirilgan.
Samarqanddagi tramvay yo‘li mart oyida ishga tushirilishi aytilmoqda. Samarqandga tramvayni qaytarish tashabbusi 2016-yilning oktabr oyida Shavkat Mirziyoyev tomonidan, u hali O‘zbekiston Prezidenti vazifasini bajaruvchi sifatida faoliyat olib borayotgan vaqtda berilgan edi.
Keyinroq Samarqandga 2011—2012-yillarda Toshkent uchun Chexiyadan sotib olingan oltita Vario LF tramvaylari olib kelindi. Toshkent tramvayi 2016-yilning bahorida o‘z faoliyatini tugatgan.Mavzuga doir: Toshkent tramvayining 115 yillik tarixiga nuqta qo‘yildi
Izoh (0)