16 январь куни Чуй вилоятининг Сўқулуқ туманидаги «Дача» қўрғони ҳудудида содир бўлган авиаҳалокат сабабларини ўрганиш учун ҳукумат комиссияси тузилди, деб ёзади «АКИпресс». Тегишли қарорни бош вазир Сооронбай Жээнбеков имзолади.
Ҳукумат матбуот хизматига кўра, қарорга мувофиқ, ҳукумат комиссиясига бош вазир биринчи ўринбосари Муҳаммадқалий Абулғозиев раҳбарлик қилади.
Комиссия таркибига, шунингдек, республиканинг фавқулодда вазиятлар вазири, соғлиқни сақлаш вазири, ташқи ишлар вазири, ички ишлар вазири, Миллий хавфсизлик давлат қўмитаси раиси ва бошқалар кирди.
Гонконгдан Истанбулга учаётган Turkish Airlines авиакомпаниясига тегишли Boeing 747 юк самолёти 16 январь, душанба куни Тошкент вақти билан 6:25 да Бишкек остонасидаги «Дача» қўрғонидаги уйлар устига қулаган.
Сўнгги маълумотларга кўра, ҳодиса оқибатида 35 киши ҳалок бўлган, 15 та уй вайрон бўлган, қурбонларнинг 4 нафари эса самолёт экипажи аъзоларидир.
Изоҳ (0)