Янгиланган Mercedes-Benz GLA’нинг энг арзони қарийб 29 минг евродан сотилади (фото)

Mercedes-Benz компанияси GLA кроссоверининг янгиланган версиясини намойиш этди. «Мотор»нинг хабар беришича, модель Детройт автосалонида дебют қилган.

Рестайлингдан сўнг моделнинг олд чироқлари янгиланган, бамперлари бироз қайта ишланган ва унга бошқа фалшрадиатор панжараси ўрнатилган.

Mercedes-Benz GLA’га буюртма асосида қўшимча ўрнаттириш мумкин бўлган ускуналар қаторида ёруғлик диодли асосий чироқлар пайдо бўлган. Улар эски авлод кроссоверларидаги биксенон чироқлар ўрнини эгаллаган.

Йўлтанламаснинг мотор гаммаси 184 от кучига эга бензинли янги двигатель билан тўлдирилган. Мазкур юргизгич GLA 220 модификацияси учун мўлжалланган бўлиб, тўлиқ узатмага уланиш тизими билан бирга тақдим этилади.

Моторлар қаторида бошқа ўзгаришлар йўқ. Аввалгидек, автомобиллар 150, 211 ва 381 от кучига эга тўрт цилиндрли, бензинда ҳаракатланувчи уч хил мотордан бири ўрнатилган ҳолда ҳам ишлаб чиқарилади.

Янгиланган GLA’да, шунингдек, атрофни кузатиш тизими ускуналари, қўлда ишлов берилган чарм ўриндиқлар, тўқнашув хавфи юзага келганда автоматик тормозланиш тизими ҳамда орқа бампердаги датчик ёрдамида багажни очиш функцияси каби янгиликлардан фойдаланиш мумкин.

Янгиланган Mercedes-Benz GLA’нинг энг арзон модификацияси 28 минг 940,8 евродан сотилиши айтилмоқда.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.