Ким Чен Ин Кимсусан саройида бобоси ва отаси хотирасига ҳурмат бажо келтирди

Шимолий Корея етакчиси Ким Чен Ин 1 январь, якшанба куни анъанага кўра Кимсусан саройига йўл олди. Бу ҳақда «ТАСС» хабар бермоқда.

Корея меҳнат партияси ва Давлат кенгаши раиси саройда ўрнатилган Ким Ир Сен ва Ким Чен Ир ҳайкаллари қаршисида уларнинг хотирасига ҳурмат бажо келтирди. Бобоси ва отаси жасадлари солинган шаффоф тобутлар қўйилган залларга ташриф буюрди.

Янги йил муносабати билан мамлакат аҳлига йўлланган табрикда Ким Чен Ин «КХДР ва Жанубий Корея ўртасидаги ихтилофга чек қўйиш», «корейс миллати уриниши билан Шимол ва Жануб орасидаги муносабатлар яхшиланишига йўл очиш»га чақирди.

Шу билан бирга, Ким Чен Ин мамлакат ҳарбий салоҳиятини янада мустаҳкамлаш ниятида экани, КХДР қитъалараро баллистик ракетаси яратилиши охирги босқичда эканлигини билдириб ўтди.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.