Швейцариянинг Монтре шаҳрида AIBA Ижроия қўмитаси йиғилиши ва ташкилотнинг 70 йиллиги муносабати билан бўлиб ўтган тантанали маросимда Рио–2016 Олимпиада чемпиони – ўзбекистонлик Ҳасанбой Дўсматов «Йилнинг энг яхши боксчиси» соврини билан тақдирлангани ҳақида хабар берилганди.
«Sports.uz» нашрининг маълум қилишича, мазкур маросимда бошқа йўналишларда ҳам ғолибларга мукофотлар топширилди.
AIBA талқини бўйича 2016 йилнинг энг яхшилари
Ҳасанбой Дўстматов (Ўзбекистон) – йилнинг энг яхши боксчиси;
Никола Адамс (Буюк Британия) – йилнинг энг яхши аёл боксчиси;
Билли Уолш (АҚШ) – йилнинг энг яхши мураббийи;
Cuba Domadores (WSB чемпиони, Куба) – йилнинг энг яхши жамоаси;
Вакас Кришан (Ҳиндистон) – APB йўналишида йилнинг энг яхши боксчиси;
Дэвид Моррелл (Куба, жаҳон чемпиони) – йилнинг энг яхши ёш боксчиси;
Хелмут Рансе – йилнинг энг яхши супервайзери.
Маросимнинг фахрий меҳмонлари сифатида жаҳон бокси ривожига ўз ҳиссасини қўшган машҳур боксчилар – украиналик Владимир Кличко, ҳиндистонлик Мери Ком, кубалик Феликс Савон ва франциялик Брахим Аслум ташриф буюрди.
Тантанали кеча давомида Рио–2016 Олимпия ўйинлари ғолиби Ҳасанбой Дўстматов Атланта–1996 Олимпиада чемпиони Владимир Кличко билан биргаликда суратга тушди.
Қайд этиш керакки, Владимир Кличко боксга қўшган ҳиссаси ва натижалари учун AIBA томонидан бокс афсонаси деб эътироф этилди.
Хабарда қайд этилишича, маросимга йиғилганлар бокс тарихида ёрқин из қолдирган, шу йилнинг 3 июнь куни вафот этган ҳамда «Бокс қироли» сифатида эътироф этилган америкалик боксчи Муҳаммад Али хотирлади.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)