Ўзбекистон миллий терма жамоасига чақирилмайдиган тўпурар Темурхўжа Абдухолиқовнинг 2016 йилда урган голлари (видео)

2016 йилни Тошкентнинг «Локомотив» футбол клубида ўтказган ва рақиблар дарвозасига 22 та гол урган ҳужумчи Темурхўжа Абдухолиқов мавсум тўпурарига айланганди. «Championat.asia» нашри унинг шу мавсумда урган голларидан тайёрланган роликни Youtube саҳифасига жойлади.

Темурхўжа Абдухолиқов йил давомида бир нечта гол урган бўлса-да, Ўзбекистон миллий терма жамоасидан чақирув қоғози олмади. Терма мураббийи Самвел Бабаян Абдухолиқов унинг принципларига тўғри келмаслигини айтиб ўтди.

Маълумот учун, футболчилик фаолиятини «Бунёдкор» клубида бошлаган Темурхўжа Абдухолиқов Самвел Бабаян раҳбарлик қиладиган «Пахтакор» билан 2011 йил шартнома имзолаб, уч мавсум шу клуб сафида тўп сурганди.

Олий Лига—2016 якунида Темурхўжа Абдухолиқовга Малайзиянинг «Т-Тим» клуби қизиқиш билдиргани айтилди. Орада «Т-Тим» Павел Смоляченко, Фарҳод Тожиев каби ўзбекистонлик футболчиларни кўрик учун чақирди, бироқ Темурхўжанинг «Т-Тим» сафига етиб боргани борасида маълумот чиқмади.

Футболчи «Пахтакор» ва «Локомотив» клубларидан ташқари 2013—2015 йиллар давомида Хорватиянинг «Ҳайдук Сплит» футбол клубида ҳам тўп сурган.