Хонанда Ботир Қодировнинг 17 декабрь, шанба куни Андижондаги «Истиқлол» тантаналар саройида бўлиб ўтиши кутилган «Кўнгил изҳори» номли концерт дастури бекор қилинди. Бу ҳақда «Sayyod.com» хабар бермоқда.
Хабар беришларича, концерт ҳақида 10 кун аввалдан радиоканаллар орқали реклама берилган, маҳаллий мухлислардан бирининг «Sayyod.com»га маълум қилишича, «концертнинг барча чипталари сотиб бўлинган эди».
«Наҳотки Ботир Қодиров концерт ташкилотчилари билан келиша олмагани учун, ўзи туғилиб ўсган шаҳардаги мухлисларини овора қилса?», — дейилади «Sayyod.com»да эълон қилинган мухлис хатида.
Ўз навбатида, Ботир Қодировнинг продюсери Асрор Исахўжаев мазкур ҳолат юзасидан изоҳ берган: «Андижондаги концерт учун ташкилотчилар фақат ‘закалат’ пулини берган, бу пулга биз поездга чипта олганмиз. Келишув бўйича, пулнинг қолгани концертдан аввал берилиши керак эди. Аммо ташкилотчилар бугунгача турли баҳоналар қилишди, орага кафолат сифатида кимларнидир қўйишга ҳам уринишди. Бугун тонгда эса ўша ташкилотчиларнинг ўзи, чипталар улар истаган суммада сотилмагани учун, концертни бекор қилиш таклифи билан чиқишди».
Исахўжаевнинг қўшимча қилишича, нафақат Ботир Қодиров, балки бошқа хонандалар ҳам вилоятлардаги концертлар учун келишилган хизмат ҳақини олдиндан 100 фоиз қабул қилиб олади.
«Кўп ҳолларда пулни ‘концерт пайти ёки концертдан кейин берамиз’, деган ваъдалардан куйганмиз. Яқинда, ноябрда ҳам шунга ўхшаш воқеа юз берган эди, ҳалигача пулларимизни ололмаяпмиз», — дейди Асрор Исахўжаев.
Хабарда концерт ташкилотчиси айнан ким эканига аниқлик киритилмаган. Мухлис хатига илова қилинган концерт чиптаси суратида: «‘Ўзбекнавў тақдим этади», ёзувини кўриш мумкин.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)