«Америка» бош мураббийи: Роналду? У ҳам оддий бир банда, футболкадаги номлар ҳеч нарсани ҳал қилмайди

Бугун — 15 декабрь куни Мадриднинг «Реал»и клублар ўртасидаги Жаҳон Чемпионатининг ярим финалида Мексиканинг «Америка» клубига қарши майдонга тушади.

«Реал» бу турнирга жиддий назар билан қарайдими? Мексика клуби «қироллик клуби» учун қандайдир кутилмаган совға тайёрлаб қўйганми? Учрашув олдидан ҳар икки клуб вакиллари ўз фикри билан ўртоқлашди.

Серхио Рамос

«Мен бу турнирни ёрқин ранглар билан эслайман. Ярим финал ва финалда гол ургандим. Бу сафар ҳам шундай бўлиши учун ҳаракат қиламан. Турнирдаги ғалаба энг кучли жамоа бўлиш мақомини беради. Шу боисдан ҳам ундаги ғалаба биз учун муҳим».

Рикардо Ла Волпе («Америка» бош мураббийи)

«Биз Японияга саёҳат учун келмадик. Ундаги иштирокимиз клуб сифатида қандай ўсаётганимизни билдиради. Футболкадаги номлар эса ҳеч қандай аҳамият касб этмайди. Бугун бизга кучли ҳарактер ва эркакларга ҳос матонат керак бўлади. Ҳа, айтганча, менинг жамоам бугун бутунлай эркин тўп суради. Аҳир ҳамма бизга аутсайдер кўзи билан қарамоқда».

«Биз Роналдунинг кимлигини биламиз, у ҳам оддий бир банда. Кроосни ҳам, Модрични ҳам таниймиз. Симеоне айтиб ўтганидек, агар рақиб учун бўш зоналар яратиб берилмаса, улар билан оддий футболчининг фарқи у қадар катта эмас. Одатда голлар кимнингдир оламшумул ҳаракатлари эвазига эмас, хатолар натижасида урилади. Биз шундай хатолардан тийилишимиз керак».

Каземиро

«Биз ҳар қандай турнирда ютишни истаймиз. Мавсумни ажойиб ўтказгандик, энди уни худди ўша нотада якунлаш ниятимиз бор. Замонавий футболда рақибни ўрганмаслик мумкин эмас. Биз уларни ўргандик ва энди нима қилишни биламиз».

Зинедин Зидан

«Мен рақиб жамоа мураббийининг фикрларига қўшиламан. ‘Реал’ либосида майдонга тушиш ғалаба қозониш учун жуда-жуда камлик қилади. Ютиш учун биздан катта куч талаб қилинади. Чунки рақиб қандай кучга эга эканини биламиз».

Криштиану Роналду

«Биз Японияга таътил учун келмадик. Биз ғалаба қозонишни ва қувончимизни мухлислар билан баҳам кўришни истаймиз. Жаҳон чемпионлиги ‘Реал’ учун жуда муҳим».

Маълумот учун, «Реал» клуби президенти Фларентино Перес Японияда футболчилар билан учрашиб, улар билан гаплашди, деб ёзди «Sports.ru». Сўзининг якунида Перес футболчилардан барча масалани ҳал қилишни «Депортиво» билан ўйин каби сўнгги дақиқага олиб қўймасликни сўради.