Саудия чемпиони «Ал-Аҳли» «Барселона»га қарши биргина ўйин учун Умар Абдулраҳмонни ижарага олди

Бугун — 13 декабрь куни Қатар пойтахти Доҳада Qatar Airways Cup Match of Champions доирасида Саудия Арабистони чемпиони «Ал-Аҳли» ва Испания чемпиони «Барселона» ўзаро куч синашади.

«Championat.asia» маълумотига кўра, «Ал-Аҳли» футбол клуби аслида Саудияда туғилган, лекин БАА терма жамоаси учун майдонга тушадиган Умар Абдулраҳмонни битта ўйин учун «Ал-Айн» клубидан ижарага олган. Ўз жамоасини Осиё Чемпионлар Лигасининг финалига қадар олиб чиққан Умар Абдулраҳмон энди «Барса» етакчиларига қарши ўйинда иштирок этади.

«Барселона» бунга қадар Саудия клубига қарши бирорта ҳам ўйинда майдонга тушмаган. Умуман араб жамоаларига қарши эса 6 та ўйинда иштирок этган. Шуларнинг фақатгина 1 тасида Кувайтнинг «Казма Спортинг» клубини таслим қила олмаган — 1:1. Қолган барчасида Каталония клуби ғолиб чиққан.

Саудия Арабистони клубига қарши ўйин учун Луис Энрике асосий футболчилари билан ташриф буюрган:

Тер Штеген, Силлессен, Масип, Херард Пике, Иван Ракитич, Серхио Бускетс, Денис Суарес, Арда Туран, Андреас Иньеста, Луис Суарес, Лионель Месси, Неймар, Рафинья, Хавьер Маскерано, Пако Алькасер, Хорди Альба, Люка Дин, Серхи Роберто, Андре Гомеш, Алейкс Видаль, Юмтити, Алена, Борха Лопес.