Қирғизистонда 11 декабрь, якшанба куни бўлиб ўтадиган конституцияга ўзгартиришлар бўйича референдум ва маҳаллий кенгашларга сайловлар олдидан «Жимлик куни» бошланди. Бу ҳақда «ТАСС» хабар бермоқда.
Референдум рўйхатларда қайд этилган сайловчиларнинг 30 фоиздан ошиғи иштирок этган тақдирда бўлиб ўтган ҳисобланади. Конституцияга киритиш таклиф этилаётган ўзгаришлар қабул қилиниши учун уларни овоз беришда қатнашганларнинг ярмидан ортиғи маъқуллаши лозим.
Шундай бўлган тақдирда келгуси йил декабридан бошлаб Қирғизистонда президент ваколатлари қисқартирилиб, бош вазир ва парламент ҳуқуқлари кенгайтирилади, шунингдек, суд ва ҳуқуқ-тартибот тизимида ислоҳотлар ўтказилади.
Референдум билан бир пайтда шаҳар ва қишлоқ кенгашлари депутатлари сайлови ўтказилади. Охирги маълумотларга кўра, шаҳарлардаги 595 депутатлик ўрнига 35 сиёсий партиянинг салкам 7 минг номзоди даъвогарлик қилмоқда.
Эслатиб ўтамиз, олдинроқ Қирғизистондаги жойлашган барча сайлов участкалари маълумотларни автоматик тарзда ҳисобловчи овоз бериш электрон қутилари билан жиҳозлангани маълум қилинганди.
Изоҳ (0)