БМТ Хавфсизлик Кенгаши Ливия қуролли гуруҳларини Триполида 1 декабрь куни бошланган тўқнашувларни зудлик билан тўхтатишга чақирди, шунингдек, низони сиёсий тартибга солиш ҳақидаги битимга тўлиқ риоя қилиниши кераклиги ҳақида огоҳлантирди, деб ёзади «ТАСС».
7 декабрь, чоршанба куни кечқурун матбуот учун қабул қилинган баёнотда Хавфсизлик Кенгаши аъзолари Ливиядаги хавфсизлик билан боғлиқ вазият, шунингдек, ўзаро рақобатлашаётган сиёсий кучлар ва гуруҳлар ўртасидаги чуқур келишмовчиликлар юзасидан хавотир билдирди.
Танклар иштирокидаги шафқатсиз жанглар Ливия пойтахтида 1 декабрь куни авж олди. Тўқнашувларда турли қуролли гуруҳлар, шу жумладан, БМТ кўмагида ташкил қилинган ўтиш ҳукумати тарафдорлари ва Халифа ал-Гвейлнинг тан олинмаган ҳукумати жойлашган Мисурат шаҳридаги экстремистлар қатнашмоқда.
Хавфсизлик Кенгаши қабул қилинган баёнотда Ливиядаги барча томонларни тўқнашувларни бас қилиб, «барча ҳал этилмаган масалаларни тартибга солиш учун» президент кенгаши билан конструктив тарзда ишлашга, шунингдек, мамлакатни, унинг иқтисодиётини қайта тиклашга, терроризмга қарши курашга диққат-эътиборни қаратишга чақирди.
Изоҳ (0)