Футбол бўйича Ўзбекистон Кубогининг финал учрашуви якунланганидан кейин «Насаф» ҳамда «Бунёдкор» клубларининг Осиё Чемпионлар Лигасидаги рақиблари аниқ бўлди. Бу ҳақда «Championat.asia» маълум қилди.
Чемпионлар Лигасининг 2017 йилги мавсумида Ўзбекистоннинг уч клуби иштирок этади. «Локомотив» мамлакат чемпиони сифатида мусобақанинг гуруҳ босқичидан иштирокини бошласа, сўнгги икки йил давомида гуруҳдан чиқиш вазифасини уддалай олмаган «Насаф» ва «Бунёдкор» ўтиш ўйинида иштирок этади.
«Насаф» кубок финалида имкониятни бой берганидан кейин Баҳрайннинг «Ал-Ҳид» клубига рақиб бўлди. Бу жамоа Қаршида таслим этилса, 2-босқичда Саудия Арабистонининг «Ал-Фатеҳ» клубига рақиб бўлинади. Битта учрашувдан иборат бўладиган плей-офф Саудия чемпионатининг 10-туридан кейин бирорта ҳам ғалабага эришмай, 13-ўринда бораётган «Ал-Фатеҳ» майдонида бўлиб ўтади.
Ўзбекистон Олий Лигасини 2-ўринда якунлаган «Бунёдкор» эса Қатарда «Ал-Жаиш» меҳмони бўлади. Сардор Рашидов ҳаракат қиладиган «Ал-Жаиш» Қатар Юлдузлар Лигаси пешқадами бўлиб турибди. Клуб Чемпионлар Лигасининг шу мавсумида ярим финалга қадар етиб боришни уддалаганди.
Сардор Рашидов 2016 йилги мавсумда ҳам Ўзбекистон клуби билан тўқнаш келган бўлиб, «Насаф» дарвозасига гол уришга ҳам муваффақ бўлган.
«Локомотив» футбол клубининг гуруҳ босқичидаги рақиблари плей-офф ўйинлари якунига етганидан кейин аниқ бўлади. Плей-офф беллашувларининг биринчиси 31 январь куни, иккинчиси эса 7 февраль кунига тайин қилинган. Гуруҳ босқичи ўйинлари эса 20 февралдан старт олади.
Ўзбекистон клубларининг рақиблари 99 фоизга ҳал бўлган. ОФК буни расман 12 декабрь куни эълон қилади.
Изоҳ (0)