Futbol bo‘yicha O‘zbekiston Kubogining final uchrashuvi yakunlanganidan keyin “Nasaf” hamda “Bunyodkor” klublarining Osiyo Chempionlar Ligasidagi raqiblari aniq bo‘ldi. Bu haqda “Championat.asia” ma’lum qildi.
Chempionlar Ligasining 2017-yilgi mavsumida O‘zbekistonning uch klubi ishtirok etadi. “Lokomotiv” mamlakat chempioni sifatida musobaqaning guruh bosqichidan ishtirokini boshlasa, so‘nggi ikki yil davomida guruhdan chiqish vazifasini uddalay olmagan “Nasaf” va “Bunyodkor” o‘tish o‘yinida ishtirok etadi.
“Nasaf” kubok finalida imkoniyatni boy berganidan keyin Bahraynning “Al-Hid” klubiga raqib bo‘ldi. Bu jamoa Qarshida taslim etilsa, 2-bosqichda Saudiya Arabistonining “Al-Fateh” klubiga raqib bo‘linadi. Bitta uchrashuvdan iborat bo‘ladigan pley-off Saudiya chempionatining 10-turidan keyin birorta ham g‘alabaga erishmay, 13-o‘rinda borayotgan “Al-Fateh” maydonida bo‘lib o‘tadi.
O‘zbekiston Oliy Ligasini 2-o‘rinda yakunlagan “Bunyodkor” esa Qatarda “Al-Jaish” mehmoni bo‘ladi. Sardor Rashidov harakat qiladigan “Al-Jaish” Qatar Yulduzlar Ligasi peshqadami bo‘lib turibdi. Klub Chempionlar Ligasining shu mavsumida yarim finalga qadar yetib borishni uddalagandi.
Sardor Rashidov 2016-yilgi mavsumda ham O‘zbekiston klubi bilan to‘qnash kelgan bo‘lib, “Nasaf” darvozasiga gol urishga ham muvaffaq bo‘lgan.
“Lokomotiv” futbol klubining guruh bosqichidagi raqiblari pley-off o‘yinlari yakuniga yetganidan keyin aniq bo‘ladi. Pley-off bellashuvlarining birinchisi 31-yanvar kuni, ikkinchisi esa 7-fevral kuniga tayin qilingan. Guruh bosqichi o‘yinlari esa 20-fevraldan start oladi.
O‘zbekiston klublarining raqiblari 99 foizga hal bo‘lgan. OFK buni rasman 12-dekabr kuni e’lon qiladi.
Izoh (0)