Аксессуарларни тўғри танлашни ўрганамиз

Ҳеч қайси либос, агар унга мос келувчи аксессуарлар тўғри танланмаса, мукаммал бўла олмайди. Тақинчоқлар, шарфлар, сумкалар, соатлар – булар сизнинг қиёфангизга кўрк бағишловчи майда-чуйдалардир. Аксессуарларни қандай қилиб тўғри танлаш ва мужассамлантириш керак? Биз сиз учун энг зарур бўлган қоидаларни танлаб олдик.

Сумкани оёқ кийим рангига қараб танламанг

Болалигимиздан бери бувиларимиз ва оналаримиз бизга оёқ кийим ва сумка ранглари албатта мос тушиши шартлигини уқтириб келишган. Узоқ вақт давомида бу моданинг энг муҳим қоидаларидан бири бўлиб ҳисобланар эди. Аммо бу қоида ҳозир эскирди. Яхшиси, очиқ рангдаги пойабзални рангсизроқ аксессуар билан тўлдиринг, ва аксинча, кул ранг ёки қора туфли очиқ рангли сумка билан жуда мос тушади.

Ёки кийим ёки аксессуар ёрқин рангда бўлсин

Кўринишингизни яратишдан олдин, сиз, қандай таассурот қолдирмоқчи эканлигингизни ва нимага алоҳида урғу берилиши кераклигини аниқлаб олишингиз керак: ёки кийимингиз, ёки аксессуарлар ва макияж ёрқин ва кўзга ташланадиган бўлиши лозим, бирдан ҳаммаси эмас. Меъёридан оширманг, акс ҳолда кўринишингиз тўтиқушнинг патларига ўхшаб қолади.

Йирик ёқани катта шарф билан яширманг

Катта ва юмшоқ ёқали устки кийим билан катта ҳажмли шарф ўраш ярамайди. Бу жуда қўпол кўринади. Қулай бўлиши учун устки кийим остидан бўйнингизга енгил рўмол ўраб олинг.

Кеча либосида бўлсангиз соат тақишни унутинг

Қўл соатлари кундалик, спорт ва иш кийимлари билан жуда мос тушади. Лекин тантанали кечалар учун кийиладиган куйлаклар ва соатларни бир вақтда кийиш тўғри келмайди.

Кенг узуклар ҳаммага ҳам ярашавермайди

Қисқа бармоқлар учун кенг узуклар мос эмас, балки унинг ингичка моделлари бармоқларни узунроқ қилиб кўрсатади. Узук танлаётганингизда буни унутманг.

Пастель (оч рангли) тусда кийинган бўлсангиз, қора туфлидан воз кечинг

Кийимдаги пастель ранглар уйғунлигини яхшиси, оч рангли пойабзал билан тўлдирган маъқул. Айни ҳолатда, тўқ рангли пойабзал кийиш мутлақо ўринсиздир.

Йирик ва рангдор тақинчоқлар билан нейтрал рангдаги кийимлар

Кўп қаторли мунчоқларни ёки ранг-баранг билагузукларни нейтрал рангдаги кийимлар билан тақинг.