Клетчатка – бизнинг танамиздаги кўпчилик аъзоларнинг тўғри фаолият кўрсатишини таъминлайдиган муҳим модда ҳисобланади. Ўсимликлардан тайёрланган озиқ-овқатлар таркибидаги озуқа толалари инсон организми фаолиятида, айниқса, ҳазм қилиш аъзолари фаолиятида муҳим роль ўйнайди. Клетчатка овқат ҳазм қилиш тизимини ножўя маҳсулотлардан, шу жумладан токсинлардан тозалашга ёрдам беради.
Клетчаткаларни етарлича истеъмол қилмаслик нафақат овқат ҳазм қилиш тизими фаолиятига, балки бутун организм фаолиятига салбий таъсир кўрсатади. Тананинг «ифлосланиши» иммун тизими самарадорлигининг пасайишига олиб келади, натижада инсон танаси турли касалликларга чалинишга мойил бўлиб қолади. Лекин дағал озуқа толаларини етарлича истеъмол қилиш ошқозон-ичак касалликларининг энг кўп тарқалган сабабларидан бири ҳисобланувчи дисбактериозни даволашга ёрдам беради.
Афсуски, ҳозирги замон кишилари муаммоси — уларнинг рационида олдиндан тозаланган (оқланган) озиқ-овқат маҳсулотларининг кўплигидир. Айтиш жоизки, бундай озиқ-овқатларни истеъмол қилиш ортиқча вазн ва семизликка олиб келади. Улар таркибида дағал ва юмшоқ озуқа толалари йўқлиги сабабли одам овқатланиш пайтида тўйганини билиш ҳиссиёти уйғонмайди, натижада организм талаб қилмаса ҳам ейишда давом этаверади.
Организмдаги балансни сақлаб туриш учун, таркибида клечаткаларга бой бўлган ўсимликлардан тайёрланган хилма-хил озиқ-овқат маҳсулотларини истеъмол қилиш лозим. Буларга нафақат мева ва сабзавотлар, балки бутун донли дон маҳсулотлари ҳамда макаронли маҳсулотлар ва дағал ундан тайёрланган нон ҳам киради.
Албатта, овқат ҳазм қилиш тизими ишини яхшилаш учун таркибида парҳезли клетчаткалари бўлган тайёр препаратлардан ҳам фойдаланиш мумкин. Бу препаратлар очлик ҳиссини сусайтиради ва парҳез қилишда қўшимча омил бўлиб хизмат қилади. Лекин шуни эсда тутиш лозимки, бундай препаратлар озуқа толаларига бой табиий маҳсулотлар ўрнини боса олмайди.
Изоҳ (0)