Aksessuarlarni to‘g‘ri tanlashni o‘rganamiz

Hech qaysi libos, agar unga mos keluvchi aksessuarlar to‘g‘ri tanlanmasa, mukammal bo‘la olmaydi. Taqinchoqlar, sharflar, sumkalar, soatlar – bular sizning qiyofangizga ko‘rk bag‘ishlovchi mayda-chuydalardir. Aksessuarlarni qanday qilib to‘g‘ri tanlash va mujassamlantirish kerak? Biz siz uchun eng zarur bo‘lgan qoidalarni tanlab oldik.

Sumkani oyoq kiyim rangiga qarab tanlamang

Bolaligimizdan beri buvilarimiz va onalarimiz bizga oyoq kiyim va sumka ranglari albatta mos tushishi shartligini uqtirib kelishgan. Uzoq vaqt davomida bu modaning eng muhim qoidalaridan biri bo‘lib hisoblanar edi. Ammo bu qoida hozir eskirdi. Yaxshisi, ochiq rangdagi poyabzalni rangsizroq aksessuar bilan to‘ldiring, va aksincha, kul rang yoki qora tufli ochiq rangli sumka bilan juda mos tushadi.

Yoki kiyim yoki aksessuar yorqin rangda bo‘lsin

Ko‘rinishingizni yaratishdan oldin, siz, qanday taassurot qoldirmoqchi ekanligingizni va nimaga alohida urg‘u berilishi kerakligini aniqlab olishingiz kerak: yoki kiyimingiz, yoki aksessuarlar va makiyaj yorqin va ko‘zga tashlanadigan bo‘lishi lozim, birdan hammasi emas. Me’yoridan oshirmang, aks holda ko‘rinishingiz to‘tiqushning patlariga o‘xshab qoladi.

Yirik yoqani katta sharf bilan yashirmang

Katta va yumshoq yoqali ustki kiyim bilan katta hajmli sharf o‘rash yaramaydi. Bu juda qo‘pol ko‘rinadi. Qulay bo‘lishi uchun ustki kiyim ostidan bo‘yningizga yengil ro‘mol o‘rab oling.

Kecha libosida bo‘lsangiz soat taqishni unuting

Qo‘l soatlari kundalik, sport va ish kiyimlari bilan juda mos tushadi. Lekin tantanali kechalar uchun kiyiladigan kuylaklar va soatlarni bir vaqtda kiyish to‘g‘ri kelmaydi.

Keng uzuklar hammaga ham yarashavermaydi

Qisqa barmoqlar uchun keng uzuklar mos emas, balki uning ingichka modellari barmoqlarni uzunroq qilib ko‘rsatadi. Uzuk tanlayotganingizda buni unutmang.

Pastel (och rangli) tusda kiyingan bo‘lsangiz, qora tuflidan voz keching

Kiyimdagi pastel ranglar uyg‘unligini yaxshisi, och rangli poyabzal bilan to‘ldirgan ma’qul. Ayni holatda, to‘q rangli poyabzal kiyish mutlaqo o‘rinsizdir.

Yirik va rangdor taqinchoqlar bilan neytral rangdagi kiyimlar

Ko‘p qatorli munchoqlarni yoki rang-barang bilaguzuklarni neytral rangdagi kiyimlar bilan taqing.