Франциялик «ўргимчак одам» эҳтиёт воситаларисиз Барселонадаги 145 метрли бинони забт этди (фото)

Франциялик баландликка чиқувчи, «Ўргимчак-одам» лақаби билан машҳур Ален Робер Барселона шаҳридаги Агбар номли осмонўпар бинога чиқди. Бу ҳақда, El Periodico нашрига таяниб, «ТАСС» хабар бермоқда.

Хабарда қайд этилишича, Робер ҳеч қандай ёрдам ва эҳтиёт воситаларисиз бинони забт этди. Баландликка чиқувчи 2006 ва 2007 йилларда ҳам мазкур бинога чиққанди.

38 қаватли Агбар биноси Каталонияда энг баланди ҳисобналади. Унинг баландлиги 145 метрни ташкил этади.

54 ёшли Ален Робер ўз натижалари туфайли Гиннеснинг рекордлари китобига киритилган. Фаолияти давомида франциялик «ўргимчак одам» 130 га яқин осмонўпар биноларга, жумладан, БААдаги Бурж Ҳалифа, Нью-Йоркдаги Empire State Building, Париждаги Эйфел минораси, Куала-Лумпурдаги Petronas, Москвадаги Миллий давлат университети биноси ва бошқа иншоотларга чиққан.

Аввалроқ Робер журналистларга 65–70 ёшига қадар турли биноларни забт этиши ҳақида маълум қилганди.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.