Беларуслик олимлар сунъий тери етиштириш услубини ўйлаб топди

Беларуслик олимлар беморнинг ҳужайраларидан сунъий тери ўстиришни ўрганди, деб ёзади «Интерфакс» Беларуснинг «ОНТ» телеканалига таяниб.

«Тери қопламасининг бутунлигини тиклаш ҳужайралар ёрдамида амалга оширилади. Умуман олганда, бундай технология яратиб бўлинган, бундай ҳужайраларни биз ажратиб чиқарамиз, улар фибробластлар деб аталади. Сўнг бу ҳужайралар одамнинг асл ҳужайралари билан аралаштирилиб, терининг куйган юзасига қўйилади», — деди Беларусь фанлар академияси биология фанлари бўлими академиги Игорь Волотовский.

Унинг таъкидлашича, бу «жуда яхши самара кўрсатмоқда».

«Одамларда тери юзасининг 90 фоизгача қисми жароҳатлангани кузатилган ҳолатлар қайд этилган — уларни ушбу ҳужайрали технологиялар ёрдамида қутқаришган», — дея қўшимча қилди академик.

Беларуслик олимлар ишлаб чиққан, бемор ҳужайралари асосида сунъий тери яратиш услуби ҳозирда давлат экспертизасидан ўтказилмоқда. Янги технологияни Беларусда икки йил ичида жорий қилиш кўзда тутилган.