Коррупцияда гумон қилинаётган Таллин мэрига хайрия маблағи эвазига бионик протез тайёрланди

2015 йилда ўнг оёғидан ажралган Таллин (Эстония) мэри Эдгар Сависаарга Финляндияда бионик протез тайёрланди. Бу ҳақда «Интерфакс» хабар бермоқда.

«Хелсинкида янги оёғим билан илк қадамларни қўйдим. Мени MTU Jalg Alla орқали қўллаб-қувватлаган кишиларга миннатдорчилик билдираман, яна бир орзуйим амалга ошди. Уч ой ичида мўъжиза рўй берди. Барчангизга раҳмат!» — деб ёзган Сависаар Facebook’даги саҳифасида.

Мэрга хайрия йиғиш учун MTU Jalg Alla нотижорат бирлашмаси тузилган ва унинг ҳисоб рақамига 23 минг евро келиб тушганди. Ўтган йил баҳорида Сависаарнинг ўнг оёғида қорасон бошланди ва шифокорлар тиззасининг юқорисидан оёғини кесиб ташлади. У охирги пайтда фақат ногиронлик аравачасида ҳаракатланаётганди.

Сависаар айни вақтда коррупцияда гумон қилиниб, мэр лавозимидан тергов даврида четлатилган. Унинг ўзи айбини тан олмади ва айбловлар сиёсий тусга эга эканлигини билдирди.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.