БМТ Бош Ассамблеяси КХШТ, МДҲ ва ШҲТ билан ҳамкорликни мустаҳкамлаш ҳақида резолюциялар қабул қилди

БМТ Бош Ассамблеяси Коллектив хавфсизлик шартномаси ташкилоти (КХШТ), Мустақил Давлатлар Ҳамдўстлиги (МДҲ) ва Шанхай ҳамкорлик ташкилоти (ШҲТ) билан ҳамкорликни чуқурлаштиришга қаратилган резолюцияларни қабул қилди, деб ёзади «ТАСС». Ҳар учала ҳужжат овоз беришсиз маъқулланди.

МДҲга тааллуқли ҳужжатда ташкилотнинг «савдо ва иқтисодий тараққиёт, статистик маълумотлар ва иқтисодий ахборот билан айирбошлаш, маданият, таълим, соғлиқни сақлаш, спорт, туризм, фан ва инновациялар, атроф-муҳит муҳофазаси ҳамда табиий ва техноген офатларга қарши кураш каби соҳаларда минтақавий ҳамкорликни мустаҳкамлаш» бўйича фаолиятига эътибор қаратилган. Бош Ассамблея БМТ бош котибига иккала ташкилот ўртасидаги ҳамкорликни мустаҳкамлаш мақсадида МДҲ ижрочи котиби билан доимий маслаҳатлашувлар ўтказишни таклиф қилди.

Резолюциялардан яна бири «Шанхай ҳамкорлик ташкилотининг тинчлик ва барқарор тараққиётни таъминлаш, минтақавий ҳамкорликни ривожлантиришда ёрдам бериш, аҳил қўшничилик алоқаларини ва ўзаро ишончни мустаҳкамлаш борасидаги муҳим роли»ни қайд этади.