Россиянинг «Искандар» ва C-400 ракета мажмуаларининг Калининград вилоятига жойлаштирилиши Европадаги хавфсизликни беқарорлаштиради. Бу ҳақда АҚШ Давлат департаменти матбуот хизмати бошлиғи Жон Кирби брифингда маълум қилди, деб ёзади «РБК».
Унинг сўзларига кўра, «Россия сўнгги ўн йиллик давомида Европадаги турли воқеаларга жавобан ‘Искандар’ ракеталарини Калининградга жойлаштириш ҳақида таҳдид қилиб келди». Кирбининг айтишича, ҳеч қандай воқеалар ривожи «бундай ҳарбий жавоб»ни талаб қилмайди.
«Биз Россияни хавфсизлик ва барқарорликни илгари суриш мақсадларига тўғри келмайдиган гаплар ва ишлардан тийилишга чақирамиз», — деди дипломат.
2016 йилнинг октябрида Россия мудофаа вазирлиги россиялик ҳарбийлар Калининград вилоятига «Искандар» ракета мажмуаларини жойлаштирганини тасдиқлади. C-400 зенит-ракета мажмуасининг биринчи дивизиони эса бу ерга 2012 йилда келтирилган. Шунингдек, 21 ноябрь куни вилоятга «Бастион» қирғоқ ракета мажмуаси жойлаштирилгани ҳақида хабарлар пайдо бўлди.
Изоҳ (0)