Боб Дилан Нобель мукофотини топшириш маросимига боришдан бош тортди

Адабиёт бўйича 2016 йилги Нобель мукофотига лойиқ деб топилган америкалик қўшиқчи Боб Дилан уни олиш учун Стокгольмга боришдан бош тортди, деб ёзади «РБК». Бу ҳақда Associated Press Швеция академиясига таяниб хабар берган.

Академия хабарида айтилишича, Дилан «мукофотни шахсан қабул қилиб олишни истарди, аммо, афсуски, баъзи шароитлар туфайли, бу мумкин эмас».

Мукофотни топшириш маросими 10 декабрь куни бўлиб ўтади.

Академиядагилар Диланнинг қарорини ҳурмат қилишини айтди. Энди унинг Нобель маърузасини кутишмоқда. Қоидага мувофиқ, у ярим йил ичида ўтказилиши керак.

Эслатиб ўтамиз, Боб Дилан «Америка қўшиқчилик анъанаси доирасида янги поэтик ибораларни яратгани учун» мукофотга лойиқ деб топилган эди.