Николас Гордон Уитни Хьюстоннинг қизи ўлимига алоқадорлиги ҳақидаги иш бўйича 36 млн доллар тўлайди

Америкалик қўшиқчи Уитни Хьюстоннинг ўтган йили вафот этган қизи — Бобби Кристина Брауннинг йигити бўлган Николас Гордон қизнинг ўлимига эҳтимолий боғлиқлиги ҳақидаги иш бўйича 36 миллион доллар тўлайди, деб ёзади «ТАСС».

Бундай қарорни 17 ноябрь, пайшанба куни Жоржия штатининг Фултон округи судьяси Жексон Бедфорд чиқарди.

Хонандалар Уитни Хьюстон ва Бобби Брауннинг ягона фарзанди, 22-ёшли Бобби Кристина Браун олти ой сунъий комада ётиб, 2015 йил 26 июль куни оламдан ўтди. Бобби Кристина Ник Гордон уни сув тўлдирилган ваннада ҳушсиз топганидан бери шундай ҳолатда бўлган.

Дастлабки суд-тиббиёт текшируви ўлим сабабларини аниқлай олмади. Қизнинг танасида шикастланиш аломатлари топилмаган, унда ҳеч қандай жиддий касалликлар ҳам бўлмаган.

Шу билан бирга, Бобби Кристина Брауннинг васийси ушбу ўлимда Ник Гордонни айблади: у Фултон округи олий судига тақдим этган аризада қиз комага тушган кун Гордон билан жанжаллашгани таъкидланади.

Брауннинг қариндошлари Гордонни қизнинг ўлимига алоқадорликда айблаб, у қизга наркотиклар берганлигини даъво қилди ҳамда ундан 50 миллион доллар товон пули талаб қилди. Гордон ушбу иш бўйича ҳеч қайси суд мажлисига келмади, ўз адвокатини ҳам юбормади.

Судья Бедфорд йигитни судга нисбатан ҳурматсизликда айблади ва Гордон автоматик тарзда судда ютқазди.