Жорий йилнинг 17 ноябрь куни фуқаро (истеъмолчи)ларнинг мурожаатларини қабул қилишни самарали ташкил этиш ва уларга қулайликлар яратиш мақсадида Ўзбекистон истеъмолчилар ҳуқуқларини ҳимоя қилиш жамиятлари Федерациясининг виртуал қабулхонаси фаолияти йўлга қўйилди. Бу ҳақда Ўзбекистон истеъмолчилар ҳуқуқларини ҳимоя қилиш жамиятлари федерацияси Матбуот ва ахборот бўлими хабар берди.
Истеъмолчилар томонидан ариза, таклиф ва шикоятлар Федерациянинг интернет тармоғидаги расмий www.istemol.uz веб-сайти орқали электрон (онлайн) қабул қилиниб, белгиланган тартибда амалдаги қонунчиликка асосан кўриб чиқилади.
Мурожаатни тўғридан-тўғри веб-саҳифа ёки Федерация тизимида ягона «1091» ишонч телефони орқали йўллаш имконияти мавжуд.
Ўзбекистон истеъмолчилар ҳуқуқларини ҳимоя қилиш жамиятлари федерацияси (қисқача маълумот)
Ўзбекистон истеъмолчилар ҳуқуқларини ҳимоя қилиш жамиятлари федерацияси 2002 йилда ташкил этилган нодавлат нотижорат ташкилотидир. Бугунги кунда унинг тизимида 14 та ҳудудий бирлашма, 193 та туман (шаҳар) жамияти мавжуд бўлиб, маҳалла, корхона, ташкилотлар ва муассасаларда 5943 та таянч гуруҳи ташкил этилган ва уларга 506 719 киши аъзодир.
Федерация Ўзбекистон Республикаси Конституцияси, қонунлари, хусусан, «Истеъмолчиларнинг ҳуқуқларини ҳимоя қилиш тўғрисида», «Жисмоний ва юридик шахсларнинг мурожаатлари тўғрисида», «Ижтимоий шериклик тўғрисида»ги қонунлари, бошқа қонунчилик актлари ва ўз Устави асосида фаолият юритади.
Федерациянинг бош мақсади истеъмолчилар ҳуқуқлари ва манфаатлари ҳимоя қилиш учун жамоатчиликни кенг жалб этиш, ички истеъмол бозорида сифати паст, одамлар ҳаёти ва соғлиғига зарарли товарлар сотилишига йўл қўймаслик устидан жамоатчилик назоратини кучайтириш, аҳолининг ҳуқуқий ва истеъмол маданиятини оширишдан иборатдир.
Федерация 1) уй-жой коммунал, 2) транспорт, 3) сервис, 4) савдо ва умумий овқатланиш, 5) алоқа ва коммуникация, 6) тиббий хизмат кўрсатиш йўналишларида истеъмолчиларнинг ҳуқуқ ва манфаатларини ҳимоя қилади.
Жорий йилнинг ўтган 9 ойи давомида Федерация ва унинг ҳудудий тузилмалари ҳамда туман (шаҳар) жамиятларига истеъмолчилардан жами 7 641 та мурожаат (ариза, таклиф ва шикоят)лар келиб тушган.
Мазкур ариза ва шикоятларнинг 7 078 таси яъни, 92,6% ижобий ҳал этилиши натижасида, истеъмолчилар фойдасига жами 2 862 710,1 минг сўм етказилган зарар қайта ҳисоб-китоб қилиб берилди.
Изоҳ (0)