Россия ва АҚШ ташқи сиёсий маҳкамалари раҳбарлари Сергей Лавров ҳамда Жон Керри Суриядаги тангликни бартараф этиш масалаларини муҳокама қилишни давом эттирди. Телефон орқали мулоқот 18 ноябрь, жума куни Америка томони ташаббуси билан бўлиб ўтди, дея хабар беради «ТАСС».
«Перу пойтахти Лимадаги Осиё—Тинч океани иқтисодий ҳамкорлиги форуми доирасида бўлиб ўтган суҳбатнинг ривожи сифатида Суриядаги ҳолат муҳокамаси давом эттирилди. Асосий эътибор Шарқий Алепподаги вазиятга қаратилди», — дейилади Россия ТИВ хабарида.
Суриядаги вазият Лавров ва Керрининг Лимадаги учрашувида асосий мавзулардан бири бўлганди.
«Алоқалар натижа беряпти, бироқ ҳаммаси америкаликлар биз билан келишувларини бажаролмаганлигига сабаб бўлган муаммога, яъни мўътадил мухолифатни ‘Жабҳат ан-Нусра’дан ажратишга келиб тақаляпти. Мазкур гуруҳни Асадга қарши асосий куч сифатида сақлаб қолиш истаги намоён бўлаётганига далиллар кўп ва бизда ҳам шундай таассурот қолмоқда. Ваҳоланки, ‘Жабҳат ан-Нусра’ Қўшма Штатлар, Россия ва БМТ томонидан ҳам террорчилар рўйхатига киритилган. Шундай бўлса-да, вазиятдан чиқиш йўлларини топишга ҳаракат қиламиз. Жон Керри ҳам бундан манфаатдор кўринади», — дея таъкидлади Лавров.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)