Қирғизистон ҳуқуқ-тартибот органлари ходимлари пранкерларнинг Украина президенти Пётр Порошенко билан телефон суҳбатини ташкиллаштиришга алоқадорликда гумон қилинаётган республика фуқаросини қўлга олди, деб ёзади «РБК» Қирғизистон ташқи ишлар вазирлигига таяниб.
Гумонланувчи тергов иш бўйича барча вазиятни аниқлаштиргунига қадар ҳибсда сақланади. Иккала мамлакат ташқи сиёсий муассасалари раҳбарлари ҳодисани биргаликда текширишга келишиб олди, унинг якунлари Европада хавфсизлик ва ҳамкорлик ташкилотининг декабрь бошида Гамбургда бўлиб ўтадиган Ташқи ишлар вазирлари кенгаши доирасида режалаштирилган икки томонлама учрашув чоғида кўриб чиқилади.
Аввалроқ Украина президенти матбуот котиби Святослав Цеголко Порошенконинг пранкерлар билан суҳбатлашганини тасдиқлаган ва бундай «ўйин» Қирғизистон ТИВ ходимлари иштирокисиз амалга ошмаганини тахмин қилган эди.
Ноябрь бошида Украина президентининг расмий сайтида Украина етакчиси Қирғизистон президенти Алмазбек Атамбаев билан телефон орқали суҳбатлашгани ҳақида хабар пайдо бўлди, кейинроқ у ўчириб ташланди.
Қирғизистон президенти аппарати раҳбари ўринбосари эса Қирғизистон президенти Порошенко билан телефон орқали мулоқот қилмаганини айтиб, Порошенко пранкерлар қурбонига айланганини тахмин қилди.
16 ноябрь куни россиялик пранкерлар YouTube’га файл жойлади, уларнинг даъво қилишича, унда улар Пётр Порошенко билан Қирғизистон президенти номидан суҳбатлашгани акс этган.
Изоҳ (0)