«Миллий тикланиш» демократик партиясидан Ўзбекистон Президентлигига номзод Сарвар Отамуратовнинг 15 ноябрь, сешанба куни Қашқадарё вилояти сайловчилари билан учрашуви бўлиб ўтди. Учрашув вилоятнинг барча туман ва шаҳарлари сайловчилари билан онлайн видеоконференция орқали мулоқот тарзида бўлиб ўтди. Бу ҳақда «Дарё»га партия вилоят кенгаши ахборот хизмати маълум қилди.
Учрашувни халқ депутатлари Қашқадарё вилоят кенгашидаги Ўзбекистон «Миллий тикланиш» демократик партияси гуруҳи аъзоси Алламурод Келдиев очиб берди ва олиб борди. Номзоднинг вилоятдаги ишончли вакили Сайфулла Махматмўминов йиғилганларни Сарвар Отамуратов таржимаи ҳоли билан таништирди. Шундан сўнг номзод сайловолди Дастурининг асосий йўналишлари юзасидан сўз олди.
Сарвар Отамуратов вилоятдаги йирик саноат корхоналарининг экспорт салоҳиятини ошириш масалалари муҳандислик-коммуникация ва йўл-транспорт инфратузилмасига боғлиқ эканлигини таъкидлади. Дунё бозорига янги йўллар очиш, Ўзбекистонни бошқа давлатлар, минтақалар билан боғлайдиган транспорт коммуникациялари барпо этиш масаласига алоҳида эътибор қаратди.
Номзод енгил ва ихчам тўқимачилик корхоналари сонини кўпайтириш, уларда маҳаллий хом ашёни чуқур қайта ишлайдиган замонавий технологияларни жорий қилишни қўллаб-қувватлади. Давлат компаниялари ва давлат улуши устунлик қиладиган корхоналарнинг молия-хўжалик фаолияти шаффофлигини таъминлаш орқали уларнинг фаолият самарадорлигини ошириш лозим, деб ҳисобламоқда.
Сарвар Отамуратов миллий иқтисодиёт ривожи етук мутахассис-кадрларга боғлиқ эканлигини ҳисобга олган ҳолда, замонавий билим ва малакага эга инженер-техниклар, молия-иқтисод, корпоратив бошқарув менежменти, ахборот технологиялари бўйича мутахассислар тайёрлашни тубдан кучайтириш ва мазкур соҳалардаги истеъдодли ёшларни қўллаб-қувватлаш тарафдори эканлигини билдирди.
Номзод сайловолди дастурида илгари сураётган вазифалар қашқадарёлик сайловчиларда катта қизиқиш уйғотди. Сўзга чиққан сайловчилар дастур юзасидан ўз муносабатларини билдирди.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)