“Milliy tiklanish” demokratik partiyasidan O‘zbekiston Prezidentligiga nomzod Sarvar Otamuratovning 15-noyabr, seshanba kuni Qashqadaryo viloyati saylovchilari bilan uchrashuvi bo‘lib o‘tdi. Uchrashuv viloyatning barcha tuman va shaharlari saylovchilari bilan onlayn videokonferensiya orqali muloqot tarzida bo‘lib o‘tdi. Bu haqda “Daryo”ga partiya viloyat kengashi axborot xizmati ma’lum qildi.
Uchrashuvni xalq deputatlari Qashqadaryo viloyat kengashidagi O‘zbekiston “Milliy tiklanish” demokratik partiyasi guruhi a’zosi Allamurod Keldiyev ochib berdi va olib bordi. Nomzodning viloyatdagi ishonchli vakili Sayfulla Maxmatmo‘minov yig‘ilganlarni Sarvar Otamuratov tarjimai holi bilan tanishtirdi. Shundan so‘ng nomzod saylovoldi Dasturining asosiy yo‘nalishlari yuzasidan so‘z oldi.
Sarvar Otamuratov viloyatdagi yirik sanoat korxonalarining eksport salohiyatini oshirish masalalari muhandislik-kommunikatsiya va yo‘l-transport infratuzilmasiga bog‘liq ekanligini ta’kidladi. Dunyo bozoriga yangi yo‘llar ochish, O‘zbekistonni boshqa davlatlar, mintaqalar bilan bog‘laydigan transport kommunikatsiyalari barpo etish masalasiga alohida e’tibor qaratdi.
Nomzod yengil va ixcham to‘qimachilik korxonalari sonini ko‘paytirish, ularda mahalliy xomashyoni chuqur qayta ishlaydigan zamonaviy texnologiyalarni joriy qilishni qo‘llab-quvvatladi. Davlat kompaniyalari va davlat ulushi ustunlik qiladigan korxonalarning moliya-xo‘jalik faoliyati shaffofligini ta’minlash orqali ularning faoliyat samaradorligini oshirish lozim, deb hisoblamoqda.
Sarvar Otamuratov milliy iqtisodiyot rivoji yetuk mutaxassis-kadrlarga bog‘liq ekanligini hisobga olgan holda, zamonaviy bilim va malakaga ega injener-texniklar, moliya-iqtisod, korporativ boshqaruv menejmenti, axborot texnologiyalari bo‘yicha mutaxassislar tayyorlashni tubdan kuchaytirish va mazkur sohalardagi iste’dodli yoshlarni qo‘llab-quvvatlash tarafdori ekanligini bildirdi.
Nomzod saylovoldi dasturida ilgari surayotgan vazifalar qashqadaryolik saylovchilarda katta qiziqish uyg‘otdi. So‘zga chiqqan saylovchilar dastur yuzasidan o‘z munosabatlarini bildirdi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)