Ҳиллари Клинтон АҚШ президентлигига сайловларда мағлубиятга учрашида Федерал қидирув бюроси (ФҚБ) раҳбари Жеймс Комини айблади. Бу ҳақда собиқ номзоднинг сайлов комиссияси ҳомийлари билан телефон орқали мулоқотига таяниб, Washington Post маълум қилди, дея хабар беради «ТАСС».
«Мазкур сайловлар муваффақиятли бўлмаганининг кўплаб омиллари бор. Бироқ таҳлилларимиз Комининг мактуби асоссиз шубҳа-гумонлар уйғотгани ва ҳаракатимиз суръатлари тўхтаб қолишига олиб келганини кўрсатди. Унинг мактуби сайлов кампаниямиз ўзининг чўққисига чиққанда чоп этилди. Ҳамма нарса бизнинг фойдамизга ҳал бўлаётганди», — дея таъкидлаган Клинтон.
Собиқ номзод телефон орқали мулоқотда қаттиқ тушкунликда эканлигини яшириб ўтирмади.
«Чуқур қайғудаман. Ўзимни бундай эмасдек кўрсатиш ниятим йўқ. Барча зўр бериб меҳнат қилгани учун ҳам ушбу мағлубият биз учун ўта оғир», — дея тан олган Ҳиллари.
Эслатиб ўтамиз, ФҚБ раҳбари Жеймс Коми сайловлар арафасида Клинтоннинг электрон ёзишмалари бўйича иш янги тафсилотлар пайдо бўлгани сабабли қайта тикланганини маълум қилган ва бу ҳақда Конгрессга мактуб йўллаганди.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)