Францияда 2015 йил 13 ноябридаги терактлар қурбонлари эсланмоқда. Мамлакат президенти Франсуа Олланд Париждаги терактлар содир этилган барча жойларга бориб, қурбонларнинг яқинлари билан учрашмоқда, деб хабар берди «Ведомости».
Олланд Париж мэри Анн Идальго билан бирга ўтган йили уч нафар худкуш Франция ва Германия терма жамоалари ўртасидаги футбол ўйини чоғида ўзини портлатиб юборган Stade de France стадионига борди. Хотира маросимлари терактлар рўй берган Carillon, Le Petit Cambodge, La Bonne Biere, Le Comptoir Voltaire, La Belle Equipe қаҳвахоналари ва Bataclan концерт залида ҳам бўлиб ўтди. Уларнинг ҳар бирида қурбонлар номи битилган ёдгорлик лавҳалари ўрнатилди.
Stade de France стадионида 11 ноябрь, жума куни Франция ва Швеция терма жамоалари ўртасидаги ўйиндан аввал ўтган йилги воқеалар эсланди. Bataclan концерт зали 12 ноябрь, шанба куни терактлардан сўнг илк бор очилди. Унинг қурбонлари хотирасига бағишланган концертда британиялик машҳур рок-қўшиқчи Стинг иштирок этди.
Маълумот учун, Парижда 2015 йил, 13 ноябрда содир этилган терактлар туфайли 130 киши ҳалок бўлган, 380 дан ортиқ киши яраланганди.
Изоҳ (0)