Энг қиммат яхталар рейтинги эълон қилинди

Нидерландиянинг Oceanco кемасозлик корхонаси қарийб 90 метр узунликка эга Y715 яхтасини тақдим этди. Ноябрь ойида Кариб денгизи бўйлаб круиз сафарлари бошланиши инобатга олинган ҳолда тақдимот шу кунларга мўлжалланган эди.

Ушбу тақдимот муносабати билан «Газета.ru» жаҳоннинг энг қиммат яхталарини эсга олди.

The Rising Sun, 200 миллион доллар

Қарийб 138 метр узунликка эга Rising Sun дунёнинг энг узун яхталари рейтингида 10-ўринни эгаллаб турибди. Кема Oracle компанияси бош директори Ларри Эллисонга тегишли.

Яхтада баскетбол ўйини учун майдонча бўлиб, ундан вертолёт қўналғаси сифатида ҳам фойдаланиш мумкин; шунингдек, яхтада кинозал, вино сақланадиган омборхона, спортзал ва спа бор.

Яхтанинг беш сатҳида умумий майдони 8 минг квадрат метрга тенг жами 82 хона мавжуд. Бортда бир пайтнинг ўзида 16 меҳмон дам олиши мумкин, уларга 30 нафар экипаж аъзоси хизмат кўрсатади.

Seven Seas, 200 миллион доллар

Яхта эгаси — машҳур режиссёр Стивен Спилберг. Бу шахсий кемада бир пайтда 14 меҳмон жойлашиши мумкин, бунинг учун еттита каюта кўзда тутилган. Экипаж 26 кишидан иборат бўлиши мумкин.

Яхтада проекторли кинотеатр, вертолёт қўниш майдони, тренажёр зали ва манзарали ҳовуз бор. Бундан ташқари, яхта замонавий интерьери билан машҳур.

Lady Moura, 210 миллион доллар

Lady Moura саудиялик миллионер Нассар Рашидга қарашли. Шунга мувофиқ, яхта шарқона ҳашамат услубида безатилган. Жумладан, бортга 24 каратли олтин билан кеманинг номи ёзилган. Яхтанинг баланд уст қаватларига катта шишали деразалар билан зеб берилган. Юқори палубада эса ҳовуз ва қум майдончаси пляж вазифасини бажаради. Ушбу қаватнинг томи очилади. Албатта, бу кемада ҳам вертолёт қўниш майдончаси бор.

Lady Moura’нинг энг машҳур жиҳати 18 метрли тушлик столидир. У Британия қироллик оиласи аъзоси, Christie’s аукцион уйи фахрий раиси, таниқли мебель ишлаб чиқарувчиси виконт Линли томонидан яратилган.

Яхтада бир пайтда 30 меҳмон жойлашиши мумкин, 60 кишилик экипаж эса уларга барча қулайликларни яратиб беради.

Al Mirqab, 250 миллион доллар

Қатарнинг собиқ бош вазири шайх Ҳамад бин Жасим бин Жобир ат-Танийга тегишли яхта 24 меҳмон ва 55 кишилик жамоага мўлжалланган.

Юқоридаги каби бу яхтада ҳам мароқли дам олиш учун барча шароитлар мавжуд. Унинг ўзига хослигини эса қўлда ясалган биллур қандил ва зиналар ҳамда америкалик ҳайкалтарош Дейл Чихулининг шишали инсталляциялари намоён этади.

Кема узунлиги — 133 метр. Унда иккита ҳовуз, кинотеатр ва вертолёт қўналғаси мавжуд.

Al Said, 300 миллион доллар

Уммон султони Кобус бин Саиднинг севимли яхтаси матбуот нигоҳидан узоқ тутилади, негаки унинг хўжайини ОАВ диққатини хушламайди.

Мишмишларга кўра, кемада концерт зали бўлиб, унинг саҳнасига 50 мусиқачидан иборат бутун бошли оркестр сиғади. Палубанинг катта қисми ўраб олинган ва кондиционерда совутилади. Яхта 70 меҳмон ва 154 кишилик экипажга мўлжалланган.

Dubai, 350 миллион доллар

162 метр узунликдаги яхта 72 меҳмон ва 88 кишилик жамоага мўлжалланган чинакам шаҳарчадир. У катталиги бўйича дунёда учинчи ўринда туради.

Dubai одатда Logo Island сунъий оролида, Дубай амири шайх Муҳаммаднинг ёзги саройига яқин ҳудудда туради.

Саккиз палубали яхтада меҳмонларга учта лифт, ҳовуз, спа-салон, шишали зина, кўплаб тушлик столлари мунтазир. Кутилмаган иқлимий шароитлар учун вертолёт қўниш майдончаси ва сув ости кемаси назарда тутилган.

Eclipse, 450 миллион доллардан 1,2 миллиард долларгача

Eclipse Германиянинг Blomh&Voss компанияси томонидан ишлаб чиқарилган. Дизайн устида Лондонда жойлашган Terence Disdale Design компанияси ишлаган. Яхта эгаси — россиялик миллиардер Роман Абрамович. 162,5 метр узунликдаги яхтада тўққизта палуба, 62 меҳмонга мўлжалланган 24 та люкс-каюта, иккита ҳовуз, кинозал, рақс майдони ва вино омборхонаси бор. Ичимликлар учун идишлар дунёдаги энг қиммат биллур бўлмиш Австрия биллуридан махсус ишланган. Шунингдек, бу ерда улкан массаж хонаси бўлиб, унинг деворларига ўрмаловчилар ва қоплонлар терилари тортилган. Яхтанинг яна бир ўзига хос жиҳати — ёмон ниятли кишилар ва папарацциларни аниқловчи ўз ҳимоя тизими.

Streets of Monaco, 1 миллиард доллар

Streets of Monaco яхтаси сув устидаги шаҳарни эслатади. Дизайнерлар бу ерда Монако кўчаларини акс эттиришга уринган бўлиб, унда шинам меҳмонхоналар, Cafe de Paris ресторани, La Rascasse тунги клубининг митти нусхалари ва ҳатто Монако Гран-приси йўналишини такрорловчи картинг-трек барпо этилган. Streets of Monaco марказида жойлашган «Атриум» пастки ва юқори сатҳларни ўзаро боғлайди. Ҳар бир сатҳда еттитадан меҳмонхона бўлиб, уларнинг ҳар бири, ўз навбатида, ётоқхона, ванна ва балкон билан таъминланган. Улкан майдонига қарамай (1,5 минг квадрат метр), бу ерда фақат 16 меҳмон дам олиши мумкин.

Яхта ҳозирча ҳеч кимга тегишли эмас. 2011 йилда Британиянинг The Yacht Island компанияси томонидан яратилган яхта шу қадар ғайриоддий ва қиммат бўлиб чиқдики, унга ҳалигача харидор топилган эмас. У Туркия портларидан бирида эгасини кутиб турибди.