The Washington Post (Ҳиллари Клинтонни қўллаб-қувватлайди) ва ABC News (ҳеч бир номзодни қўллаб-қувватламайди)нинг биргаликдаги сўрови 1 ноябрь куни, АҚШдаги президент сайловига роппа-роса бир ҳафта қолганида Дональд Трамп АҚШнинг собиқ давлат котиби Клинтонни бир фоизга ортда қолдираётганини кўрсатди. Трамп 2016 йил майидан бери биринчи марта пешқадамликни қўлга олди, бу ҳодиса Клинтоннинг ёзишмаларини текшириш қайта бошлангани, шунингдек, ФҚБ миллиардер-номзоднинг Кремль билан алоқалари ҳақида ҳеч қандай далил топа олмагани ҳақидаги хабарлар ортидан юз берди. Meduza нашри янги сўров натижалари нимадан дарак бериши ва охир-оқибат Трампда Клинтонни ортда қолдириш имконияти бор-йўқлиги ҳақида ҳикоя қилади.
Трампдан кўпдан бери биринчи марта ижтимоий сўровда Клинтонни ортда қолдиришга муваффақ бўлди. The Washington Post ва ABC News’нинг биргаликдаги тадқиқоти АҚШ президенти сайловида сайловчиларнинг 46 фоизи ўз овозини Трампга, фақат 45 фоизи Клинтонга овоз беришини кўрсатди. Сўнгги бор бундай ҳолат 2016 йил май ойида, ҳали Клинтон ҳам, Трамп ҳам ўз партиясининг расман ягона номзодига айланмаган вақтда юз берган эди. Ўшандан бери The Washington Post ва ABC News сўровларида мунтазам равишда Клинтон пешқадамлик қилган, эътиборли томони, октябрь охирида улар орасидаги фарқ 12 фоизга етган эди.
Муҳим изоҳ: гап сайловчиларнинг умуммиллий овоз бериши ҳақида бормоқда, АҚШда эса президент сайлашга вакил қилинган шахслар (танловчилар) овоз бериши натижаларига кўра аниқланади, уларнинг сони эса ҳар штатда турлича. Масалан, бир номзод сайловчиларнинг кўпроқ овозини тўплагани ҳолда танловчиларнинг овоз беришида ютқазиши ҳам мумкин — кенжа Жорж Буш 2000 йили айнан шу йўл билан президентга айланган. The Washington Post ва ABC News’нинг сўровномаси танловчиларнинг овоз беришига дахлдор эмас.
The Washington Post ва ABC News сўровномаси ҳар доим ҳам ғолибни тўғри топавермайди. 2004 йилги сайловга бир ҳафта қолганида мазкур сўров Жон Керри кенжа Жорж Бушни бир фоизга ортда қолдираётганини, 2012 йили эса Митт Ромни Барак Обамани яна бир фоизга ортда қолдираётганини кўрсатган. Маълумки, ўша сайловларда Буш ва Обама ғалаба қозонган — мос равишда уч ва тўрт фоизлик фарқ билан.Трампда сайлов арафасида обрўим ошди, деб ҳисоблаш учун асослар бор. Бунинг учун республикачиларнинг номзоди айтарли иш ҳам қилгани йўқ. Биринчидан, ФҚБнинг Трамп ва Россия ўртасидаги боғлиқликни аниқлаш юзасидан олиб борган суриштируви натижалари маълум бўлди — демократлар мазкур алоқаларни бир неча бор мавзуга айлантириб, Клинтон штаби бошлиғининг ёзишмалари сизиб чиқиши ва бошқа хакерлик ҳужумларида Россия махсус хизматларини айблаб чиққан эди.
The New York Times’нинг ёзишича, ФҚБ мутахассислари Трамп ёки унинг маслаҳатчилари Россия билан бевосита боғлиқлигини кўрсатувчи далилларни топа олмаган. Хусусан, ФҚБ Trump Foundation ва Россиянинг «Альфа-банк»и серверлари ўртасидаги шубҳали алоқага қизиққан, бироқ терговчилар бунинг ҳам арзирли сабаби бор, деган хулосага келган: масалан, банк Trump Foundation ходимларидан бирига шунчаки реклама хатларини йўллаган бўлиши мумкин. Бундан ташқари, текширув россиялик хакерлар сайловда тартибсизлик келтириб чиқаришга уринаётганини тасдиқлаган, бироқ улар айнан Трампнинг фойдасини кўзлаб иш қилаётганини тасдиқламаган.
Иккинчидан, Ҳиллари Клинтоннинг шахсий почта сервери атрофидаги тергов қайта бошланган. Аввалроқ махсус хизмат Клинтон давлат котиби лавозимида расмий почта сервери ўрнига шахсий сервердан фойдаланганининг қонунга зид жойи йўқлигини маълум қилган эди. Бироқ яқинда янги хатлар сизиб чиқди ва ФҚБ терговни қайта бошлашга қарор қилди. Ва ниҳоят, сайловга бир ҳафта қолганида ФҚБ ахборотни ошкор этиш қонунига мувофиқ, Билл Клинтонга нисбатан олиб борилган тергов материалларини эълон қилди — уни 15 йил аввал, демократларнинг нуфузли тарафдори ҳисобланган аёлнинг эрини афв этгани муносабати билан текширишган эди. Ўшанда Клинтоннинг ҳаракатларида қонунга зид ҳеч нарса топилмаган. Ҳиллари Клинтоннинг вакиллари бу ҳужжатлар сайлов арафасида эълон қилиниши тасодиф эканини шубҳа остига олиб улгурди.
Бошқа сўровларга кўра, Трамп Клинтондан ортда қолмоқда. Масалан, FiveThirtyEight таҳлилий лойиҳаси Трампнинг ғалабасига бор-йўғи 30 фоизлик имкониятни прогноз қилмоқда. Нашр маълумотларига кўра, Клинтонга сайловчиларнинг қарийб 49 фоизи овоз беради ва у 300 дан ортиқ танловчиларнинг овозини қўлга киритади, ваҳоланки, сайловда ғолиб чиқиш учун танловчиларнинг 270 та овози ҳам етарли. Трампни эса сайловчиларнинг 45 фоизи қўллаб-қувватлаши кутилмоқда. Шундай бўлса-да, Трампнинг йўллари ҳали тўла ёпилмаган.
FiveThirtyEight’нинг ёзишича, Трамп Клинтон билан орадаги фарқни тахминан 2 фоизгача қисқартириши керак — шунда республикачиларнинг номзодида Ҳиллари учун ҳал қилувчи аҳамиятга эга Колорадо ва Нью-Гэмпширда яхши имконият пайдо бўлади ва сайловчилари ҳали ҳам иккиланиб турган штатларда унинг имконияти сезиларли ошиб кетади. Бундай ҳолатда Клинтоннинг ғалабаси мутлақ ҳал бўлган масаладек кўринмайди ва Трамп ўзи учун танловчиларнинг 270 та керакли овозини қўлга киритиши ҳам мумкин.
[playbuzz-item playbuzz_url="muhrima10/aqsh-prezidenti-saylovida-kim-g-olib-chiqadi"]
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)