Тожикистоннинг «Барқи тожик» давлат энергетика холдинги раҳбарияти мамлакат электр таъминотисиз қолиши сабабларини расман ўрганишга киришди, махсус комиссия ташкил этилди. Бу ҳақда холдинг матбуот котиби Назиржон Ёдгорий маълум қилди, дея хабар беради «Интерфакс».
«28 октябрь, соат 18 дан 29 дақиқа ўтганда мамлакат энергетика тизимида кўзда тутилмаган вазият юзага келиши ва аварияга қарши реле ҳимояси автоматик тарзда ишга тушиши туфайли Тожикистоннинг деярли барча ҳудудида электр таъминоти тўхтатилди. Фақат Тоғли Бадахшонда узилиш кузатилмади. Холдинг раиси Мирзо Исмоилзода давлат телеканаллари орқали чиқиш қилиб, вазиятни тушунтирди ва аҳолидан етказилган ноқулайлик учун узр сўради», — дея таъкидлади матбуот котиби.
Электр энергиясини босқичма-босқич уланиши гидроэлектр станциялар агрегатлари ва юқори кучланишли электр узатиш линияларининг навбатма-навбат ишга туширилиши натижасида тикланди. Ҳозирда республика энергия тизими одатий тартибда ишламоқда.
Изоҳ (0)