АҚШдаги суд Johnson & Johnson’га саратон билан хасталанган аёлга 70 млн доллар тўлаш мажбуриятини юклади

АҚШнинг Миссури штати суди косметика маҳсулотларини ишлаб чиқарувчи Johnson & Johnson ширкатига, корпорация маҳсулотларидан фойдаланганидан сўнг, саратон хасталиги кучайиб кетган аёлга 70 миллион доллар миқдорида компенсация тўлаш мажбуриятини юклади. Бу ҳақда «ТАСС» хабар бермоқда.

Хабар беришларича, суд маслаҳатчилари ҳайъати 2012 йили тухумдонида саратон аниқланган калифорниялик аёл — Дебора Жаннеккинига 70 миллион доллар миқдорида компенсация тўлаб бериш ҳақидаги даъвони қаноатлантириш ҳақида қарор қабул қилган.

Даъвогар томонининг сўзларига кўра, аёл Johnson & Johnson томонидан ишлаб чиқарилган ва болалар баданига сепиладиган доридан узоқ вақт давомида фойдалангани учун, унда хасталик пайдо бўлган.

«Биз суднинг бугунги қарори устидан шикоят қиламиз. Биз илмий тадқиқотларга асосан иш кўрамиз. Бу тадқиқотларга кўра, Johnson’s Baby Powder болалар сепкиси хавфсиз ҳисобланади», — дейди компания вакили Кэрол Гудрич.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.