Молдовада порахўр йўл полициячилари ёппасига ҳибсга олинди

Молдовада йўл полициясининг 28 ходими 26 октябрь эрталабки соатларда ИИВ раҳбарияти иштирокида ўтган Миллий полиция инспекторати йиғилишида ҳибсга олинди. Улар порахўрликда айбланди, деб хабар беради «Интерфакс».

Айтилишича, йиғилиш чоғида Миллий полиция инспекторати раҳбари Александр Пинзарь 28 нафар полициячининг номини тилга олди, уларга Коррупцияга қарши кураш миллий маркази зобитлари яқинлашиб, кишанбанд ҳолда залдан олиб чиқиб кетди. Яна беш нафар ходим қидирувга берилди.

Уюшган жиноятчилик ва коррупцияга қарши кураш прокуратураси раҳбари Виорел Морарнинг сўзларига қараганда, полиция бош инспекторати ва прокуратурага порахўрлик қурбонига айланган фуқаролар арз қилган.

«17 мурожаат бор. Булар орасида оддий фуқаролар бўлмиш ҳайдовчилар ҳам, автохизматлар кўрсатувчи компаниялар раҳбарияти ҳам бор. Уларнинг бари тамагир инспекторларга 100 лейдан минг долларгача тўлаган. Масаланинг нархи содир этилган қоидабузарликнинг оғирлигига боғлиқ бўлган», — тушунтирди у.