Давлат раҳбарларининг шахсий ошпазлари ўзлари томонидан асос солинган клубнинг навбатдаги қурултойини ўтказиш учун Ҳиндистон пойтахти Деҳлида учрашди. Бу ҳақда «Интерфакс» хабар бермоқда.
1977 йили Парижда асос солинган Club des Chefs des Chefs клубининг йиллик тадбири ҳар йили жаҳоннинг турли мамлакатларида бўлиб ўтади.
Деҳлида бўлаётган қурултойда жаҳоннинг 20 дан ортиқ мамлакатидан келган меҳмонларни Ҳиндистон бош вазири Нарендра Модининг ошпази Монту Саини меҳмон қилмоқда. Модининг ўзи ҳам бош ошпазларни шахсан олқишлаган.
Меҳмонлар орасида Оқ уй ошхонаси раҳбари Кристета Кромфорт ва Буюк Британия қироличаси Елизавета Иккинчининг шахсий ошпази Марк Флэнаган борлиги айтилмоқда.
«Барча президентлар бир-бири билан учрашган. Бош ошпазларнинг ҳам ўзига хос G20 ташкилоти бўлса, ёмон бўлмасди, деб ўйлаб қолдим. Сиёсат одамларни бир-биридан ажратади, таомга тўла стол эса — бирлаштиради», — деди клуб асосчиси Жиль Брагар тадбир очилишида.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)