Италия Vimpelcom ва Hutchinson’нинг алоқа оператори ташкил этиш бўйича 7,9 млрд евролик келишувини маъқуллади

Vimpelcom ва Hutchinson Holdings компанияларининг Италиядаги активларини қўшма корхона — мобил алоқа операторини ташкил этиш йўли билан бирлаштириш ташаббуси Италия иқтисодий тараққиёт вазирлиги томонидан тўлиқ маъқулланди. Бу ҳақда «ТАСС» хабар бермоқда.

Бунда гап Vimpelcom’га тегишли Wind Telecomunicazioni ва Hutchinson’га тегишли 3 Italia операторларининг бирлашуви ҳақида бормоқда. Келишув қиймати 7,9 миллиард еврога, қўшма корхонанинг фойдаси миқдори эса йилига 700 миллион еврога баҳоланмоқда.

«Vimpelcom ва Hutchinson Италия маъмуриятининг ушбу қарорини олқишлайди. Мазкур қарор келишув йил охиригача ёпилишини англатади», — дейилади Vimpelcom ахборотида. Аввалроқ компанияларнинг келишуви Еврокомиссия томонидан маъқулланган эди.

Vimpelcom — халқаро телекоммуникация холдингларидан биридир. Хусусан, у Ўзбекистонда «Билайн» савдо белгиси остида хизмат кўрсатувчи алоқа операторга эгалик қилади.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.