Буюк Британия ҳукумати Франциянинг Кале шаҳридаги қочоқлар лагерида қолаётган ва Бирлашган Қиролликда қариндошлари бўлган вояга етмаган муҳожирларни имкон қадар тезроқ қабул қилиши шарт. «ТАСС»нинг хабар беришича, бу ҳақда Франция турар-жой сиёсати вазири Эмманюэль Косс айтиб ўтган.
«Британия ҳукумати халқаро ҳуқуқ меъёрларига риоя этишни бошлаши учун Франция ички ишлар вазири Бернар Казнёв Англияга бир неча бор сафар қилиб, The Guardian’га интервью беришга мажбур бўлаётганига тоқат қилиб бўлмайди», — деди вазир.
Сўнгги маълумотларга кўра, Каледаги қочоқлар лагери ҳудудида тахминан 1,3 мингга яқин вояга етмаган муҳожир бор, улардан 500 нафари Буюк Британияда қариндоши борлигини маълум қилган.
Каледа фаолият олиб бораётган нодавлат ташкилотлар ходимлари тақдим этган ахборотга кўра, сўнгги бир ҳафта ичида вояга етмаган муҳожирларнинг 200 нафари Буюк Британияга кириш учун рухсат олган.
«Оиласи билан бирлашиш ҳуқуқига эга барча вояга етмаган шахслар зудлик билан Британия ҳудудига ўтказилишини истаймиз. Бир неча юз киши энг қисқа муддат ичида у ерга киритилиши керак», — деди Косс.
Кале чеккасида жойлашган қочоқлар лагерида, турли ҳисоб-китобларга кўра, 6—10 минг нафар муҳожир бор. Уларнинг аксарияти Судан, Афғонистон ва Эритрея фуқароларидир. 24 октябрь куни Франция ҳукумати лагердаги муҳожирларни кўчиришни бошлади.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)