Жанубий Кореяда ночор кексалар иссиқ бошпана ва озиқ-овқат таъминланган қамоқхоналарга жўнатишлари учун атайин жиноятлар содир этмоқда. Бу ҳақда «ТАСС» хабар бермоқда.
Адлия вазирлиги маълумотларига кўра, мамлакат тарихида биринчи марта ёши 60 дан ўтган кишилар сони жами маҳбусларнинг 10 фоизидан ошиб кетди. Улар Жанубий Кореяда қайд этилган барча жиноятларнинг 9 фоизини амалга оширган.
Экспертларнинг таъкидлашича, жиноятлар кекса кишилар иқтисодий қийинчиликка дуч келаётгани билангина боғлиқ эмас: 60 ёшдан ўтганлар мамлакат аҳолининг салкам 20 фоизини ташкил этмоқда, шу сабабли маҳбуслар сафида кексалар кўпаймоқда. Шу билан бирга, вазирлик вакиллари уларнинг кўпчилиги қамоқхонага ўз истаги билан тушаётганини тан олди. Қарияларнинг аксарияти ҳатто озод этилганидан сўнг ҳам давлат бошпана, овқат ва кийим-кечак билан таъминлайдиган панжара ортига интилади.
Яқингача Жанубий Кореяда пенсия тизими мавжуд эмасди. Кексалиги учун маблағ жамғармаган ёки яқинлари қайсидир сабабга кўра ёрдам кўрсатмайдиган қарияларга давлат томонидан ҳар ойда 200—300 доллар атрофида нафақа берилади. Бу пуллар Кореяда озиқ-овқатга ҳам етиб-етмайди.
Изоҳ (0)