Galaxy Note 7 смартфонининг Жанубий Кореядаги юзлаб фойдаланувчилари қурилмани ишлаб чиқарган Samsung компанияси устидан шикоят қилишга тайёр, дея хабар бермоқда «Интерфакс».
Фойдаланиш чоғида ёниб, портлаб кетиши мумкин бўлган қурилмани чақириб олиш бўйича кампания вақтида етказилган маънавий зарар ўрнини қоплаб бериш талаби билан флагман смартфоннинг 520 га яқин фойдаланувчиси Samsung’ни судга бермоқчи.
Harvest Law Firm юридик фирмаси раҳбарининг маълум қилишича, даъвогарлар гаджетларни топшириш ва янгисини олиш йўлида кетган харажатлар, вақт ва моддий йўқотишлар ўрнини тўлдиришни талаб қилмоқда.
Даъвогарлардан бири Ким Чэ Ённинг сўзларига кўра, у қурилмаларни биринчи чақириб олиш доирасида Note 7 смартфонини топшириш учун бензин ва бошқа йўл харажатларига тахминан 100 доллар сарфлаган.
«Ўзимни алдангандек ҳис қиляпман. Жуда ҳам жаҳлдаман ва бу телефондан ҳеч қачон фойдаланмоқчи эмасман!», — деди қурилма эгаси.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)