Одил Аҳмедов ҳаракат қиладиган «Краснодар» Россия термаси каби янги стадиондаги илк ўйинида мағлуб бўлди

Янги қурилган «Краснодар» стадиони Россия миллий терма жамоаси каби «Краснодар» клуби учун ҳам омадсиз келди.

Россия термаси ўзбекистонлик Равшан Эрматов бошқарган ундаги илк ўйинида Коста-Рикага имкониятни бой берганди. Ўзбекистонлик футболчи ҳаракат қиладиган «Краснодар» эса Европа Лигасининг 3-турида «Шальке»дан енгилди.

Аҳмедов ўйинни бошланғич таркибда ўтказиб, 75-дақиқада ўз ўрнини Павел Мамаевга бўшатиб берди. Учрашув тақдирини ҳал қилган ягона гол эса 10-дақиқада украиналик футболчи Евгений Коноплянка томонидан урилди.

3-турдан кейин «Шальке» 9 очко билан гуруҳни бошқариб турибди. «Краснодар» ҳисобида 6 очко бор. Марио Балотелли ҳаракат қиладиган Франциянинг «Ницца» клуби эса «Залсбург»ни сафарда 1:0 ҳисобида мағлуб этиб, 3-ўринга кўтарилди.