Сардор Милано: Тошкент менинг шаҳрим ва бундан кейин ҳам шундай бўлиб қолади

Ўзбекистонлик ёш хонанда, Россиянинг «Главная сцена» мусиқий лойиҳаси ғолиби Сардор Милано «Голос» шоусидаги чиқишида ўзини «Москвадан» деб таништиргани бир қатор эътирозларга сабаб бўлганди. Бу борада қўшиқчининг ўзи шундай тушунтириш берди:

«Менинг ғалабамни қувонч билан кутиб олган тингловчиларим ва ватандошларимдан миннатдорман. Минг афсуски, сўзларимни нотўғри талқин қилиб, турли гап-сўз чиқарганлар ҳам топилди», — деб Миланонинг сўзларидан иқтибос келтирган «Даракчи».

«Мен саҳнада яшаётган жойимни маълум қилдим. Мен фикримни доим қисқа ва аниқ ифода этаман. Тошкентда туғилганман, буни ҳамма билади. Бу ҳақда бошқа жойларда кўп гапирганман». Қайд этиш керак, Сардор Милано «Голос»даги чиқишида Москвадан эмас, балки шунчаки Москва деб айтиб ўтганди.

«Бу мавзуга бошқа қайтмайман. Севги ва муҳаббат менинг келажакка ишонч билан қарашимга куч беради. Тошкент доим меники ва шундай бўлиб қолади», — дея сўзларини якунлади Милано.

Аввалроқ «Sayyod.com» қўшиқчи ҳақида шундай фикр билдирганди:

«Балки юлдузлик онларидан талтайган Сардор Милано асли қаердан эканини унутдими, хуллас, ‘Москваданман’ дея ўзини таништирди. Охиригача на Ўзбекистон ва на Тошкент ҳақида лом-мим демаган бу йигитдан очиғи шу сабаб умуман кўнгил қолди. Эртага Америкага бориб, Москваниям унутиб юборса ажаб эмас».