13 октябрь куни БМТ Бош Ассамблеясининг 71-сессиясида ташкилотнинг янги бош котиби тайинланди. Бу Португалиянинг собиқ бош вазири Антониу Гутерриш бўлди. 2017 йилнинг 1 январидан иш бошлайдиган янги бош котиб ҳақида «РБК» маълумот келтиради.
Антониу Гутерриш 1949 йилда Лиссабонда туғилган. 1971 йилда Олий технология институтини тамомлаб, бир неча йил фан билан шуғулланган. 1974 йилда у Португалия Социалистик партиясига қўшилиб, ўз сиёсий фаолиятини бошлади. 1974 йил апрелида Гутерриш Чиннигуллар инқилобининг (Лиссабонда яширин ҳарбий ташкилот томонидан қон тўкмай амалга оширилган ҳарбий тўнтариш) фаол иштирокчиси бўлди. Янги давлат режими ағдарилгач, у муваққат ҳукумат таркибига кирди.
1992 йилда Гутерриш Социалистик партия тепасига келди. 1995 йилда партия парламент сайловида ғалаба қозонди, шундан сўнг сиёсатчи бош вазирлик даражасига етди.
2001 йилда Гутерриш партияси мамлакатда иқтисодий вазиятнинг ёмонлашуви туфайли сайловда мағлубиятга учради. Гутерриш бош вазирликдан истеъфо бериб, сиёсатдан чиқиб кетди. Аммо, шу билан бирга, у 2005 йилга қадар Социнтерн (халқаро ноҳукумат социал-демократик ташкилот) президенти бўлиб қолаверди.
БМТдаги фаолиятини Гутерриш 2005 йилда бошлади — ўшанда у қочқинлар ишлари бўйича БМТ олий комиссари лавозимига сайланди. Бу мавзу Гутерришга жуда яхши таниш эди — у 1991 йилда қочқинлар ишлари бўйича Португалия кенгашига асос солганди. Бу лавозимда Гутерриш 2015 йил декабрига қадар ишлади.
2016 йил октябрида Гутерриш 13 номзод орасидан БМТ бош котиблигига сайланди. Ушбу лавозимдаги фаолияти давомида сиёсатчи террорчилик хавфи, уюшган жиноятчиликка қарши кураш, наркотрафик ва эпидемияларга жиддий эътибор қаратмоқчи.
Изоҳ (0)