Ўзбекистонлик санъаткорлар орасида биринчилардан бўлиб «Истиқлол» санъат саройида бир йилда икки марта концерт дастурини тақдим этаётган хонанда Жаҳонгир Отажонов концертолди матбуот анжуманини ўтказди. Ёшлар ижод саройида бўлиб ўтган анжуманда 40 га яқин ОАВ вакиллари, хусусан, журналист Феруз Муҳаммад ҳам иштирок этди.
Аввалроқ Жаҳонгир Отажонов ушбу матбуот анжуманида кейинги концертини 2017 йил март ойида тақдим этишни, ундан кейин эса ҳар тўрт ойда бир марта концерт беришни ният қилгани ҳақида хабар берилган эди.
Шунингдек, хонанда тўйлардаги хизмати учун нега катта гонорар сўраши, концертдан фойда олиш-олмаслиги ҳақидаги саволларга ҳам батафсил жавоб қайтарган эди. Отажоновга, шунингдек, дуэтлар масаласида ҳам савол билан мурожаат қилишди.
— Ҳар бир ижодкорнинг дуэт айтгиси келади, — деди Жаҳонгир Отажонов. — Икки йилча илгари Шаҳзода бир одам орқали мен билан дуэт қўшиқ айтиш таклифини қилган экан. Шаҳзоданинг мавқеи, шоу-бизнесдаги ўрни юқори, кўчада мени кимдир танимаслиги мумкин, аммо Шаҳзодани албатта танишади. Бироқ у билан йўналишимиз ҳар хил, шунинг учун мен бу таклифга жавоб бера олмадим. Шаҳзода билан дуэт айтсам, мени янада танилардим, бу яхши натижа бериши мумкин эди. Бироқ танилиш учун ижод қилинмайди. Унинг йўналиши бошқа, менинг йўналишим бошқа. Шаҳзода билан қўшиқ куйлаган тақдиримда ҳам, бу қўшиқ чиройли бўлмасди, деб ўйладим.
Ундан аввалроқ Феруза Жуманиёзовага ўзим таклиф билан чиққанман, аммо унинг онаси: «Қани, қўшиғингни эшитиб кўрайлик-чи?!», дегани учун, дуэт бўлмади. Мен ҳам унча-мунча қўшиқни куйламайман, шу вақтгача ижодга енгил ёндашмаганман. Гаплари менга оғир ботдими, ишқилиб, Феруза Жуманиёзова билан ҳам дуэт куйламадик.
Бундан ўн йиллар олдин «Камолот»нинг тадбирида қатнашиш учун Севара Назархон билан бирга анча йўл юрганмиз. Ўшанда Севарага ҳам дуэт куйлаш таклифини қилганман. Бироқ, ўйлашимча, у билан куйлаган дуэтимиз ҳам кўнгилдагидек чиқмаган бўларди. Гулсанам Мамазоитовага дуэт айтишни таклиф қилганман, келишганмиз, аммо ўзимнинг айбим билан бу ҳам охирига етмай қолган. Согдиана билан ҳам дуэт қилмоқчи бўлгандик, афсуски, бу иш ҳам ўхшамаган.
Жаҳон эстрадасида жуда мукаммал дуэтлар бор. Биз ҳам бемалол улар даражасида ижод қилишимиз мумкин. Дуэт қўшиқни бир томоннинг таклифи билан яратиб бўлмайди, дуэтдошда ҳам фикр бўлиши керак. Мен қўшиқ ёзиб: «Мана бундай айтасиз», деганим билан, бу дуэт бўлмайди: кимдир қўшиқ тайёрласа, бошқа бири уни фақатгина куйласа — бу дуэт эмас, балки икки алоҳида хонанданинг қўшиғи бўлади, холос.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)