Футболчилар таҳлили ва эксклюзив маълумотларни тақдим қилувчи Швейцариянинг CIES Football Observatory компанияси ўзига хос тадқиқот ўтказиб, дунёдаги энг қиммат таркибга эга бўлган клублар рўйхатини эълон қилди. Бу ҳақда «iSport.ua» хабар бермоқда.
Клублар таркибининг қийматини ҳисоблашда футболчиларнинг трансфер нархи ва уларнинг маоши инобатга олинди. Поль Погбани 105 миллион еврога сотиб олган «Манчестер Юнайтед» бу борада биринчи ўринга кўтарилиб олди. Айни дамда манкунианларнинг таркиби 718 миллион еврога баҳоланмоқда.
Таркиби қимматлиги бўйича иккинчи ўринни Мадриднинг «Реал» клуби эгаллади – 634 миллион евро. Учинчи ўринда 611 миллион евро билан «Манчестер Сити» бормоқда. Таркиби 485 миллион еврога баҳоланган «Барселона» ушбу рейтингда тўртинчи ўринни эгаллади.
Бундан ташқари, сўнгги 10 йил ичида трансферлар учун энг кўп маблағ сарфлаган клублар ўнлиги тузиб чиқилди.
Бу борада «Манчестер Сити» катта устунлик билан пешқадамлик қилмоқда. 2006 йилдан буён «шаҳарликлар» футболчиларни харид қилиш учун 1 миллиард евродан ортиқ пул ишлатган. Шулардан 231 миллион евро 2016 йилнинг ёзида сарфланди.
«Челси» сўнгги 10 йилда 871 миллион евро, «Манчестер Юнайтед» эса 841 миллион евро сарфлаган.
Изоҳ (0)