Қаршида Ўзбекистон Республикаси Президенти сайловини ўтказувчи 13-Қашқадарё округ сайлов комиссиясининг сайлов участкаларини тузиш масалаларига бағишланган мажлиси бўлиб ўтди. Бу ҳақда ЎзА хабар бермоқда.
— Шаҳар ва туман ҳокимликлари, ҳарбий қисмлар командирларининг сайлов участкаларини тузиш тўғрисидаги тақдимномалари кўриб чиқилди, — дейди 13-Қашқадарё округ сайлов комиссияси раиси Исмоил Жўраев. — Вилоятда сайловчиларнинг умумий сони 1 миллион 984 мингдан зиёд эканини инобатга олиб, 884 сайлов участкаси тузиш тўғрисида қарор қабул қилинди. Сайлов участкаларининг тартиб рақами, чегараси ва манзили кўрсатилган рўйхати тасдиқланди. Округ сайлов комиссиясининг бу ҳақдаги тегишли қарори маҳаллий матбуотда эълон қилинади.
Округ сайлов комиссияси томонидан оммавий ахборот воситалари ходимлари учун ўтказилган брифингда Ўзбекистон Республикаси Президенти сайловига тайёргарлик кўриш юзасидан вилоятда амалга оширилаётган ишлар тўғрисида атрофлича маълумот берилди.
Изоҳ (0)