Шанхай ҳамкорлик ташкилоти бош котиби Рашид Алимов «ТАСС»га берган интервьюсида ШҲТ кузатувчилар миссиясининг Ўзбекистон Республикаси Президенти сайловларидаги бўлажак иштироки ҳақида гапириб берди, деб ёзади «Газета.uz».
«Ўзбекистон Республикасидаги Президент сайловлари авваламбор самимий ўзбек халқи, шунингдек, бутун минтақа ва ШҲТ макони учун катта аҳамиятга эга», — дея таъкидлади Рашид Алимов.
«Ўзбекистон Шанхай ҳамкорлик ташкилотини яратиш бошида турди, ташкилотни ривожлантиришга катта ҳисса қўшди ва қўшишда давом этмоқда. Бу Ўзбекистон Республикасининг ШҲТдаги муваффақиятли раислигида намоён бўлди, унинг авж нуқтаси эса Тошкентда 2016 йил июнида бўлиб ўтган ШҲТ саммити бўлди. ШҲТнинг Тошкентдаги саммити қарорлари ташкилот учун тарихий аҳамиятга эга, саммитнинг ўзи эса халқаро даражадаги муҳим ҳодисага айланди», — дея қайд этди у.
ШҲТ бош котиби Ўзбекистон ташкилот фаолиятида фаол иштирок этишда давом этиб, кўп томонлама ҳамкорликни ривожлантиришга ўз ҳиссасини қўшишига умид билдирди.
Рашид Алимовнинг сўзларига кўра, ШҲТ Котибияти ўзбек ва хорижий ОАВлар мониторингига киришиб бўлди.
«Бўлажак сайлов рақобат ва мусобақага бой бўлиши аниқ, кураш жуда қизиқарли бўлади. Бўлажак сайлов натижалари ўзбек халқининг манфаатларини акс эттириши, жамоатчиликнинг Ўзбекистон Республикаси гуллаб-яшнаши йўлидаги бирлашувига ёрқин мисолга айланиши шубҳасиз», — деди ШҲТ раҳбари.
Изоҳ (0)