ShHT bosh kotibi: “Saylovdagi kurash juda qiziqarli bo‘lishi aniq”
Shanxay hamkorlik tashkiloti bosh kotibi Rashid Alimov “TASS”ga bergan intervyusida ShHT kuzatuvchilar missiyasining O‘zbekiston Respublikasi Prezidenti saylovlaridagi bo‘lajak ishtiroki haqida gapirib berdi, deb yozadi “Gazeta.uz”.
“O‘zbekiston Respublikasidagi Prezident saylovlari avvalambor samimiy o‘zbek xalqi, shuningdek, butun mintaqa va ShHT makoni uchun katta ahamiyatga ega”, — deya ta’kidladi Rashid Alimov.
“O‘zbekiston Shanxay hamkorlik tashkilotini yaratish boshida turdi, tashkilotni rivojlantirishga katta hissa qo‘shdi va qo‘shishda davom etmoqda. Bu O‘zbekiston Respublikasining ShHTdagi muvaffaqiyatli raisligida namoyon bo‘ldi, uning avj nuqtasi esa Toshkentda 2016-yil iyunida bo‘lib o‘tgan ShHT sammiti bo‘ldi. ShHTning Toshkentdagi sammiti qarorlari tashkilot uchun tarixiy ahamiyatga ega, sammitning o‘zi esa xalqaro darajadagi muhim hodisaga aylandi”, — deya qayd etdi u.
ShHT bosh kotibi O‘zbekiston tashkilot faoliyatida faol ishtirok etishda davom etib, ko‘p tomonlama hamkorlikni rivojlantirishga o‘z hissasini qo‘shishiga umid bildirdi.
Rashid Alimovning so‘zlariga ko‘ra, ShHT Kotibiyati o‘zbek va xorijiy OAVlar monitoringiga kirishib bo‘ldi.
“Bo‘lajak saylov raqobat va musobaqaga boy bo‘lishi aniq, kurash juda qiziqarli bo‘ladi. Bo‘lajak saylov natijalari o‘zbek xalqining manfaatlarini aks ettirishi, jamoatchilikning O‘zbekiston Respublikasi gullab-yashnashi yo‘lidagi birlashuviga yorqin misolga aylanishi shubhasiz”, — dedi ShHT rahbari.
